Aqtóbede órt sóndirýshiler eki kún qatarynan jalǵan habarlama aldy

AQTÓBE. KAZINFORM — Oqıǵa ornyna 20-dan astam qyzmetker men birneshe tehnıka qatar bardy. Polıtsııa jalǵan habarlama bergen adamdy izdestirip jatyr.

Aqtóbe oblystyq TJD baspasóz qyzmetiniń habarlaýynsha, 18 jáne 19 qazan kúnderi Astana qalasyndaǵy «1414» baılanys ortalyǵyna Aqtóbede órt bolyp jatqany týraly habarlama túsedi. Habarlama oblystyq TJD-niń kezekshi bólimine baǵyttalyp, arnaıy qyzmet Aqtóbe qalasy Astana aýdany Bógenbaı batyr kóshesindegi kópqabatty úıge bardy. 

— Oqıǵa ornyna Aqtóbe oblysynyń TJD qutqarýshylary jiberildi. Atalǵan mekenjaıǵa kelgen kezde órttiń jáne tútinniń eshqandaı belgisi tabylmady, ıaǵnı habarlama rastalmady. Júrgizilgen tekserý barysynda órttiń múlde bolmaǵany anyqtaldy. Bul jaǵdaı jalǵan dabyl retinde tirkelip, tergeý júrgizý úshin materıal polıtsııa qyzmetine joldandy, — dep habarlady oblystyq TJD baspasóz qyzmeti. 

Oqıǵa ornyna TJD-nen 14 adam men 4 tehnıka, jedel-qutqarý jasaǵynan 3 qutqarýshy men tehnıka, apattar medıtsınasy ortalyǵynan 3 adam men tehnıka jiberilgen. Sonymen birge polıtsııa, jedel járdem men gaz qyzmeti bardy. 

Aıta keteıik, ShQO-nyń Glýbokoe aýdanyna qarasty Cheremshanka aýylynda jeke turǵyn úıden órt shyqty. Abyroı bolǵanda kórshisi órtenip jatqan úıden eki balany qutqaryp qaldy, dep habarlaıdy TJM.