Aqtóbede órt sóndirýshiler saıajaıdaǵy úılerge arnaıy dabyl júıesin tegin qondyryp jatyr
AQTÓBE. QazAqparat – Aqtóbe qalalyq tótenshe jaǵdaılar basqarmasynyń qyzmetkerleri qaýip tóngen kezde habar beretin dabyl júıesin qondyryp jatyr, dep habarlaıdy QazAqparat tilshisi.
Aqtóbe qalalyq tótenshe jaǵdaılar basqarmasy, órt sóndirý qyzmeti men eriktiler saıajaılardy aralady. Onda turatyn adamdarǵa órt qaýipsizdigi erejesin túsindirip, jylytý maýsymyna daıyndyǵyn pysyqtady. Pesh pen murjany qarap, onyń jaramdylyǵyn tekserdi.
«Qala boıynsha 140-tan astam órt tirkelip, onda 10 adam jaraqat aldy. Al 4 adam mert boldy. Sondyqtan órt qaýipsizdigi erejesin saqtaýdyń mańyzyn túsindirý jumysy bastaldy. Peshterdi qarap, ony jóndeýdi qajet etetin tusy bolsa, eskertý berip júrmiz. Sonymen birge ýly gaz shyqqanda iske qosylatyn dabyl júıesin qondyrýdy bastadyq. Bizde 1500-den astam úı tizimde bar. Onda jalǵyzbasty analar, kópbalaly otbasylar men az qamtylǵan jandar nazarǵa alynady. Birinshi kezekte osy adamdarǵa qondyrǵy tegin qondyrylady», - dedi qalalyq TJB bastyǵy Aıbat Jańabergenov.
Aıta keteıik, tótenshe jaǵdaılar qyzmeti senbi, jeksenbi kúnderi de jumysyn jalǵastyrady.
«Talap boıynsha murja úsh aı saıyn tazartylyp turýy tıis. Sonymen birge peshtiń aldynda temirden arnaıy qorshaý bolǵany durys. Kez kelgen qaýipsizdik erejesi mańyzdy», - dedi Aıbat Jańabergenov.
