Aqtóbede órt shyqqan gaz qubyry jóndelip, aýylǵa kógildir otyn berildi
AQTÓBE. KAZINFORM - Aqtóbe oblysy Oıyl aýdany Qaratal aýylyna gaz qaıta berildi. Boljam boıynsha órt jóndeý jumystary kezinde tutanǵan.
Oqıǵa keshe saǵat 17:15-te tirkeldi.
Qaratalǵa órt sóndirýshiler barǵanymen, gaz qubyryn japqan kezde órt ózdiginen óshti.
- Gazdy qaraıtyn aýylishilik slesar bar. Jóndeý jumysyn júrgizip jatqan kezde ushqynnan ot tutanyp ketken. Aýylǵa gaz taratyp turǵan qubyrdy tez arada jaýyp tastady. Sol kezde ot sóndi. Eshqandaı qaýip joq. Barlyǵy 6 saǵattan soń qaıta iske qosyldy. Mektep, balabaqsha bizde elektr togy arqyly jylytylady, ázirge olarǵa gaz qosylmaǵan edi. Sondyqtan áleýmettik mekemelerde jylý turaqty berilip turdy. Al gaz qubyrynyń qorapshasyn qaıta jóndeý kezinde qosalqy bólshek kerek bolyp, kidirip qaldyq, - dedi Oıyl aýdanynyń ákimi Asqar Qazybaev.
