Aqtóbede órt oqıǵalarynyń sany kóbeıdi
AQTÓBE. QazAqparat - Aqtóbede órttiń shyǵý deregi artty. Bul týraly oblystyq tótenshe jaǵdaılar departamentiniń basqarma bastyǵy Evgenıı Ovcharskıı aıtty, dep habarlaıdy QazAqparat tilshisi.
Aqtóbede turǵyn úı jáne kólik órti jıi tirkeldi. Kóbine adamdar otty paıdalaný erejesine saqtamaıdy. Shylym shegý de jıi órtke ákep soǵady.
«Órttiń 54 deregi shylym shegýden, 48 deregi ashyq ot quraldaryn jaryqtandyrý úshin qoldaný nátıjesinde boldy. Jazǵy maýsymda dala alqaptarynyń janýy ózekti kúıinde qalyp otyr. Jyl basynan beri aýdany 360 ga jerde 29 órt boldy. Búgingi kúni 13 birlesken mobıldi top quryldy. Olardyń quramyna tótenshe jaǵdaılar departamenti, jergilikti polıtsııa qyzmeti, orman sharýashylyǵy men jergilikti atqarýshy organdardyń ókilderi kiredi. Toptar dalalyq jáne orman alqaptaryna 26 reıd júrgizdi», - dedi basqarma bastyǵy E.Ovcharskıı.
Sonymen qatar, órttiń aldyn alý maqsatynda aýylsharýashylyǵy qurylymdarynyń, sharýa qojalyqtary basshylarymen, turǵyndarmen órt qaýipsizdigi taqyrybyna jıyn ótkizilip, túsindirý jumystary júrgizildi. Erikti órt sóndirýshilerdiń qatysýymen oqý-jattyǵý ótti.
«Bıyl órt sanynyń kóbeıgeni baıqalady. Jyl basynan beri 275 órt bolyp, 56 adam qaza tapty, 15 adam ártúrli jaraqat aldy. Osyǵan baılanysty oblys turǵyndarynan turmysta jáne kólikte órt qaýipsizdigi sharalaryn saqtaýdy, ashyq ot pen jalyndy paıdalaný kezinde jáne dala men orman alqaptaryna barǵan kezde órt qaýipsizdigi erejelerin buzýǵa jol bermeýdi suraımyz», - dedi Evgenıı Ovcharskıı Óńirlik kommýnıkatsııalar qyzmetinde ótken baspasóz máslıhatynda.
