Aqtóbede orman aǵashtary qýrap jatyr
AQTÓBE. QazAqparat - Aqtóbedegi 7 orman sharýashylyǵynyń 12 myń gektar jerinde qýraǵan aǵash bar. Aldaǵy bes jylda qýraǵan aǵashtardy kesip, ornyna jas kóshet egilýi tıis, dep habarlaıdy QazAqparat tilshisi.
Aqtóbe oblysy aýmaǵynda bar bolǵany 0,17 paıyz ormandy alqap bar. Qazirgi kezde 987 gektar aýmaqtyń 52 myń gektarynda aǵash ósip tur. Orman alqabynyń 200 myń gektardan astamyna oblys ákimdine qarasty memlekettik orman qory jaýapty.
«Aqtóbe oblysy aýmaǵyndaǵy ormannyń 12 myń gektarynda aǵash qýrap qalǵan. Olardyń kóbi respýblıkalyq tasjoldyń, temirjoldyń boıynda ornalasqan. Aldaǵy ýaqytta sol ormandardaǵy aǵashtardy kesip, qaıta jas kóshet otyrǵyzý kerek. Qazaq orman sharýashylyǵy mekemesi temirjol, tasjol boıynda qýraǵan aǵash aýmaǵyn anyqtap «Qazaqstan temir joly», «QazAvtoJol» kompanııalaryna habar berdi. Eki mekeme qarjy joq dep jumysty bastamaı otyr. Olar ázirge tek aǵash butaqtaryn qıyp jatyr. Al qýraǵan aǵashty túbirinen kesý kerek»,- dedi Aqtóbe oblystyq tabıǵı resýrstar men tabıǵatty paıdalaýdy retteý basqarmasynyń basshysy Nurjan Aqqul. Aldaǵy bes jylda qýraǵan aǵashtyń ornyna jas kóshet otyrǵyzý jospary tur. Bul jumystarǵa jergilikti bıýdjetten de qarjy bólinedi.
Aıta keteıik, Aqtóbe qalasy aýmaǵyndaǵy jasyl beldeýdi keńeıtý jumysy júrgizilip jatyr. Bıyl 430 gektarǵa 469 206 túp kóshet otyrǵyldy. Boljam boıynsha egilgen kóşettiń tek 60 paıyzy ósip shyǵady. Qýrap qalǵan jerge bir jyldan soń qaıtadan kóshet egiledi. Qazirgi tańda oblys aýmaǵyndaǵy 66 295 gektar tabıǵı orman alqaby jeke jáne zańdy tulǵalardyń menshiginde ekeni anyqtalyp otyr. Aldaǵy ýaqytta barlyǵy memlekettik orman qory aýmaǵyna engiziledi.
