Aqtóbede óńirdiń áleýmettik-ekonomıkalyq kórsetkishi qorytyndylandy
AQTÓBE. KAZINFORM – Aýdandarda keıbir kásiporyndar jumysyn ýaqytsha toqtatyp, iri jobalar aıaqtaldy. Saldarynan jekelegen salalarda tómendeý bar.
Aqtóbe oblysy ákimdigi 2025 jyldyń áleýmettik-ekonomıkalyq qorytyndysyn shyǵardy. Ekonomıka jáne bıýdjettik josparlaý basqarmasynyń basshysy Nurjan Maqsatovtyń aıtýynsha, ónerkásip, aýyl sharýashylyǵy, qurylys, kólik jáne saýdada kórsetkish 100 paıyzdan asty. Alaıda aýdandardyń bári birdeı qoıǵan mejege jete almady.
— Taldaý nátıjesinde ınvestıtsııa tartýda Muǵaljar aýdanynda, ónerkásip óndirisiniń kólemi boıynsha Yrǵyz, Qobda, Alǵa jáne Hromtaý aýdandarynda tómendeý anyqtaldy. Jekelegen salalardaǵy tómendeý birqatar kásiporynnyń ýaqytsha toqtaýyna, iri jobalardyń aıaqtalýyna jáne syrtqy ekonomıkalyq faktorlarǵa baılanysty. Qurylysta da jańa ınvestıtsııalyq jobalardyń bolmaýyna baılanysty jumys kóleminiń azaıýy baıqalady, — dedi basqarma basshysy.
«Aýyl — el besigi» joba aıasynda byltyr 11,3 mlrd teńge bólindi. Barlyǵy 53 joba iske asyrylýy tıis bolsa, onyń tek 44-i iske asty.
Aqtóbe oblystyq qarjy basqarmasynyń basshysy Erik Tursynǵalıevtiń málimetinshe, 2025 jyldyń qorytyndysynda oblystyq bıýdjettiń menshikti kirisi 311,3 mlrd teńge boldy. Bul 2024 jylmen salystyrǵanda 8,3% artyq. Ósim korporatıvtik tabys salyǵy, jeke tabys salyǵy, áleýmettik salyqtar, aktsızder, qorshaǵan ortaǵa teris áser úshin tólemder jáne jer ýchaskelerin satýdan túsken kirister esebinen tirkeldi.
— Jıynda shaǵyn bıznes pen ózin-ózi jumyspen qamtyǵandardy qoldaý, salyq bazasyn keńeıtý, jeke jáne sheteldik ınvestıtsııalardy tartýǵa erekshe kóńil bólý qajet ekeni aıtyldy. Basshylar atqarylyp jatqan jumystardy turaqty baqylap, problemalardy jedel sheship, naqty nátıjeler týraly aqparat berip otyrýy tıis. Tapsyrmalardy oryndamaǵany, jumystyń sapasyzdyǵy nemese jobalardyń keshigýi úshin qatań tártiptik sharalar qoldanylady, — dep habarlady oblys ákiminiń baspasóz qyzmeti.
Aıta keteıik, Aqtóbede bıyl 164 myń gektar jer telimi qaıta aınalymǵa shyǵarylady.