Aqtóbede onkologııalyq dertke shaldyqqan naýqastardy ońaltý bólimi ashylady
Aqtóbe oblysynyń ákimi Eraly Toǵjanov bul joly óńirdegi barlyq medıtsınalyq mekeme basshylarynyń qatysýymen jıyn ótkizdi. Qazirgi kezde oblysta 482 medıtsına mekemesi bolsa, onyń ishinde 16 jekemenshik aýrýhana men 119 ambýlatorııalyq-emhanalyq mekeme bar. Oblys ákimi óńirdegi barlyq jekemenshik emdeý mekemeleriniń qyzmetin tekserý qajet dep sanaıdy.
«Komıssııa quryp, ár mekemege obektıvti baǵa berýlerińizdi suraımyn. Jekemenshik aýrýhanalar men emhanalar, memlekettik mekemeler naýqastardyń densaýlyǵyna tolyq jaýap berýi kerek», - dedi Eraly Toǵjanov.
Sondaı-aq oblys ákimi onkologııalyq naýqastardy ońaltý máselesin tezirek sheshý qajettigin basa aıtty.
Qazirgi tańda onkologııalyq ońaltý sharalaryn júrgizetin arnaıy bólimshe joq. Onyń qyzmetin ázirge pallıatıvtik bólimshe atqaryp otyr. Al qaterli isik dıagnozy qoıylǵan 8,2 myńnan astam adam esepte tur.
«Nelikten biz adamdardy joǵaltyp jatyrmyz? Shyn máninde, hımıoterapııadan keıin ımmýndyq júıe álsireıdi. Emdeýden jáne operatsııadan keıin eki-úsh aıdyń ishinde ońaltý kerek», - dedi Eraly Toǵjanov.
Densaýlyq saqtaý salasyndaǵy ınfraqurylymdy jańǵyrtý ózekti másele bolyp qala bermek. Bıyl oblysta 5 jańa densaýlyq saqtaý nysany paıdalanýǵa beriledi. Taǵy 57 medıtsınalyq mekemeniń ǵımaraty jóndeýdi qajet etip tur.
Aımaq basshysy bul máseleni sheshýge barynsha kómek kórsetýge ýáde berdi. Sondaı-aq skrınıngtik tekserýlerdiń tıimdiligin arttyryp, jyljymaly medıtsınalyq keshenderdiń jáne telemedıtsına qyzmetteriniń beıinin keńeıtip, aýyl turǵyndaryna medıtsınalyq kómek qoljetimdi bolýy tıis. Saladaǵy kadr tapshylyǵyn azaıtý jáne olardyń biliktiligin arttyrý máselesi kún tártibinde bolady.
