Aqtóbede onkologııalyq dertke shaldyqqan balalardy emdeıtin ortalyq salynyp jatyr
AQTÓBE. QazAqparat - Aqtóbede jyl saıyn 30-35 baladan onkologııalyq dert anyqtalyp jatyr. Olardy Almaty men Astanada emes, Aqtóbede emdeý úshin onkogematologııa ortalyǵy salynyp jatyr, dep habarlaıdy QazAqparat tilshisi.
Aqtóbe aglomıratsııasy aıasynda medıtsınalyq ortalyq qurylyp jatyr. Qazir birneshe baǵyt boıynsha emdeý mekemesiniń qurylysy bastalyp, qajetti maman aldyn ala oqytylýda. Bıyl Aqtóbede Ońtústik Koreıadaǵy Seýl ulttyq ýnıversıtetimen birge keshendi dıagnostıka ortalyǵynyń qurylysy bastalady. Jergilikti dárigerler koreıalyq áriptesterimen birge bes jyl boıy jumys istep, tájirıbe jınaıdy. Ortalyq tek onkologııalyq aýrýdy emes, barlyq dertti erte anyqtaýǵa múmkindik beredi. Sonymen qatar, oblysta onkogematologııa ortalyǵy salynady.
«Qazirgi kezde onkologııalyq dertti anyqtaý, emdeý isi boıynsha eresekterge kómek kórsetiledi. Al balalardy Almaty, Astana qalasyna jiberemiz. Bıyl ortalyq qurylysy bastalady. Germanııa kompanııasymen kelissóz júrip jatyr. Qurylysty bıyl bastap, keler jyly iske qosamyz. Jylyna oblystaǵy 30-35 baladan onkogematologııa anyqtalyp jatyr. Batys óńiri boıynsha 140 bala aýrýǵa shaldyǵady eken. Zertteýler nátıesinen soń qurylys jumystarymen birge maman daıyndaý qolǵa alyndy. Sáýirde Máskeýdegi onkogematologııalyq ortalyqqa eki adamdy jiberemiz. Jyl sońyna deıin taǵy tórt dáriger bilimin jetildiredi», - dedi oblystyq densaýlyq saqtaý basqarmasynyń basshysy Áset Qalıev.
Aqtóbede ıadrolyq medıtsınalyq ortalyqtyń da qurylysy aıaqtalyp, iske qosylady. Onda pozıtrondy-emıssıondy tomografııa jáne gammalyq kamera bolady. Pozıtrondy-emıssıondy tomografııa iske qosylsa, onkologııalyq patologııalardy erte anyqtaýǵa, dertti jasýshalyq deńgeıde bilýge múmkindik týrady. Ári emniń tıimdiligin de baǵalaı alady.
Aıta keteıik, Aqtóbe qalasynda balalar stomatologııalyq emhanasy ashylyp, aýdandarda taǵy 10 medıtsınalyq mekemesiniń qurylysy bastalady.
