Aqtóbede ónerli juptar kontsert berdi
AQTÓBE. QazAqparat - Aqtóbede otbasynyń úzdik úlgisin dáripteýge arnalǵan «Qos júrektiń lúpili» atty kontsert ótti. Oǵan sahnada júrgen ónerli juptar qatysty, dep habarlaıdy QazAqparat tilshisi.
Aqtóbedegi Óner ortalyǵynda «Qos júrektiń lúpili» kontserti ótti. Kontsertke Qadilbek pen Marjan Omarovtar, Mıras pen Quralaı Bekjanovtar, Ádil men Dana, Qanat pen Aıtkúl Qudaıbergenovtar, Qurmanbek pen Rıza, Qaırat pen Juldyz, Qanat pen Sveta Aıtbaevtar qatysty. Sonymen qatar, Farıda ákesi Luqpan Joldasovpen án shyrqady.
«Qos júrektiń lúpili» atty joba eń aldymen otbasy taqyrybyn, durys tárbıe máselesin nasıhattaý maqsatynda jasalǵan. Ómirde de, ónerde de qatar júrgen dostarymyzdyń bári úlgi alarlyqtaı shańyraqtyń ıeleri. Sondaı jandardyń bir top bolyp Aqtóbede boı kótergen bizdiń Óner ortalyǵynda qazaqtyń keremet dástúrin jalǵastyryp, kópke úlgi retinde «qutty bolsyn» aıtyp kelýi - biz úshin úlken mártebe. Buryn bolmaǵan jaǵdaı»,- dep jazdy Sveta Aıtbaeva áleýmettik paraqshasyna.
Aıta keteıik, Óner ortalyǵy ótken jyly paıdalanýǵa berildi. Bul ǵımarat bıznestiń áleýmettik jaýapkershiligi aıasynda boı kóterdi. Qazir munda Aqtóbe oblystyq fılarmonııa ujymy qonystanǵan.
