Aqtóbede ondaǵan kólikti zańsyz tirkegen qylmystyq topqa sot úkimi shyqty

Aqtóbe qalasynyń № 2 sotynyń baspasóz qyzmetiniń habarlaýynsha, uıymdasqan top múshelerine Qylmystyq kodekstiń «Uıymdasqan top, qylmystyq uıym qurý jáne olarǵa basshylyq etý, sol sııaqty olarǵa qatysý», «Aldaý nemese senimdi teris paıdalaný jolymen múliktik zalal keltirý», «Laýazymdyq ókilettilikterdi teris paıdalaný», «Jekeshe notarıýstardyń ókilettikterdi teris paıdalanýy» baptary boıynsha aıyp taǵyldy. Іs materıalyna súıensek, sottalýshylardyń biri 2024 jyly shetelden ákelingen júk kólikterin bastapqy tirkeý alymyn tólemeı-aq zańsyz tirkeý maqsatynda uıymdasqan top qurady. Buryn esepten shyǵarylǵan kólikterdiń derekteri men jalǵan alyp-satý sharttaryn paıdalanyp kólik quraldaryn qaıta tirkeý shemasyn qoldanǵan.

— 2024 jyldyń shilde-jeltoqsan aılar aralyǵynda 82 kólikti zańsyz tirkep, memleketke jalpy somasy 705 mıllıon teńgeden astam zalal keltirgen. Sonymen qatar, 2025 jyly taǵy 7 kólikti tirkep, 64,6 mıllıon teńge zalal keltirdi. Taǵy 9 jalǵan alyp-satý shartyn notarıattyq kýálandyryp, 83 mıllıon teńge kóleminde zalal keltirilgen. Memleketke keltirilgen jalpy zalal somasy 852 mıllıon teńgeden asady. Keltirilgen zalaldy óteý úshin zańsyz tirkelgen 98 kóliktiń 95-ine tyıym salyndy. Sottalýshylar ózderine taǵylǵan aıypty moıyndamady, — dep habarlady Aqtóbe qalasynyń № 2 sotynyń baspasóz qyzmeti.

Sot úkimimen qylmystyq top qurǵan sottalýshy 9 jylǵa bas bostandyǵynan aıyryldy. Qalǵan 8 sottalýshy 5 jyl 6 aıdan 7 jylǵa deıingi merzimge bas bostandyǵynan aıyryldy. Azamattyq talap tolyq qanaǵattandyryldy.Úkim zańdy kúshine engen joq.

Eske salsaq, shetelden kólik ákelemin dep 106 mln teńgeni ıemdengen kúdikti Reseıden ekstradıtsııalandy. Tergeý dereginshe, kúdikti 2021-2022 jyldary shetelden avtokólik satyp alyp, jetkizip beremin degen syltaýmen úsh adamdy aldaǵan. Ol jábirlenýshilerdiń jalpy somasy 106 mln teńgeden astam qarajatyn ıemdendi degen kúdikke ilingen.