Aqtóbede on kúnde myńnan astam jaıaý júrginshi ákimshilik jaýapqa tartyldy
Aqtóbe oblysynyń aýmaǵynda júrgizýshiler arasynda jol-kólik oqıǵasynyń aldyn alý jáne jol qozǵalysy qaýipsizdigin qamtamasyz etý maqsatynda «Qaýipsiz jol» aktsııasy ótip jatyr. On kúnde júrgizýshi men jaıaý júrginshiler arasynda 7 myńnan astam quqyqbuzýshylyq tirkeldi.
«Qozǵalys jyldamdyǵy erejelerin buzǵany úshin 896 júrgizýshi ákimshilik jaýapqa tartyldy. Sonymen birge mas kúıinde kólik aıdaǵan 62 júrgizýshi anyqtaldy. Al 85 júrgizýshi joldyń qarsy baǵytyna shyǵyp, ózine ǵana emes, ózgege qaýip tóndirdi. Jaıaý júrginshilerge artyqshylyq bermegeni úshin 623 júrgizýshi ákimshilik tártippen jazalandy. Jol qozǵalysy erejesin buzǵany úshin myńnan astam jaıaý júrginshi ákimshilik jaýapqa tartyldy. Baǵdarshamǵa baǵynbaıtyndar da bar»,- deıdi oblystyq PD baspasóz qyzmetiniń jetekshisi Erbolat Sarqulov.
Aqtóbe oblysynyń polıtsııa departamenti jol qozǵalysynyń barlyq qatysýshysyn erejeni saqtaýǵa shaqyrady.