Aqtóbede omyrtqa jaryǵy otasyna júginetin naýqastar sany artty

AQTÓBE. KAZINFORM — Byltyr 110 naýqasqa ota jasaldy. Olardyń keıbiri eki aıaǵyn basa almaı, shuǵyl kómekke júgindi. 

Omyrtqa jaryǵy otasy elimizde tegin jasalady. Memlekettik-áleýmettik saqtandyrý qory arqyly da, shuǵyl kómek qajet kezde de kómek kórsetiledi.

— Naýqastar aıaǵy uıyp, bastyrmaı qalǵanda, kishi dáretke bara almaǵanda shuǵyl túsedi. Bul degenimiz júıke júıesi qysylyp qalǵany, omyrtqada jaryq bar. Otadan soń naýqas adam birden aıaǵyn basyp, júre alady. Oǵan bir táýlik qana jetkilikti. Adamda omyrtqa jaryǵy aýrýy qaıtalanýy múmkin. Ony joqqa shyǵarýǵa bolmaımyz. Qazir rasymen de mundaı dertke shaldyqqan naýqas kóp. Onyń jasyna, dene salmaǵyna qarmaıdy. Tolyq adam da, salmaǵy qalypty adam da dertke dýshar bolýy múmkin. Negizi qozǵalysy az, únemi otyratyn adamda kezdesedi jıi. Aýrýhanada ota tegin jasalady, — dedi Kópsalaly oblystyq aýrýhanasynyń neırohırýrg dárigeri Nursultan Aıtmuratov.

Memlekettik-áleýmettik saqtandyrý qorynyń Aqtóbe oblystyq fılıalynyń habarlaýynsha, keıingi jyldary omyrtqa jaryǵy dıagnozymen em izdep kelýshiler sany artty. Byltyr 110 naýqas em aldy. Mindetti-medıtsınalyq saqtandyrylǵan naýqas úshin qyzmettiń bári tegin júrgiziledi.

— Byltyr sáýir aıynda belim aýyryp, kúzde oń jaq aıaǵym uıyp qaldy. Arada aılar ótkende jaǵdaıym nasharlaı bastady. Keıin MRT-ǵa túsip, omyrtqa jaryǵy dıagnozy qoıyldy. Dáriger tek ota jasaǵanda ǵana aıaqqa turatynymdy aıtty. Aýrýhanaǵa jatqanda bir kún otaǵa daıyndady, ekinshi kúni jasady. Bári sátti ótip, aıaǵyma jan bitti. Ózim júrgizýshi bolyp jumys isteımin. Salqyn tıip, aýyr kótergennen de bolýy múmkin eken. Bári artta qalyp, em aldym, — dedi naýqas Dýman Demeýǵalıev.

Aıta keteıik, Tarazda alǵash ret bir jasar balaǵa bas súıek jikteriniń erte bitýine baılanysty kúrdeli ota jasaldy. Operatsııa respýblıkalyq mamandandyrylǵan ortalyqtarǵa joldamasyz-aq oblystyq balalar aýrýhanasynyń bazasynda jasalyp, Jambyl óńirindegi balalar neırohırýrgııasynyń damýyna mańyzdy serpin berdi.