Aqtóbede olımpıadaǵa bara jatqan oqýshylardyń qazasynan soń eki qylmystyq is qozǵaldy
Oqýshylardyń óliminen soń Qylmystyq kodekstiń 345-baby 4-bóligi jáne 141-baby boıynsha qylmystyq is qozǵaldy. Oqýshylardy nelikten polıtsııanyń alyp júrmegeni tekserilip jatyr, dep habarlaıdy Kazinform.
Oqýshylardyń qazasynan soń óńirlik kommýnıkatsııalar qyzmetinde brıfıng ótti. Onda Aqtóbe oblysy ákiminiń orynbasary Bulbul Eleýsinova balalar mingen kóliktiń nege esh ruqsat almaǵany tekseriletinin aıtty.
«Negizinen bul shara Oqý-aǵartý mınıstrliginiń buıryǵymen respýblıkalyq olımpıadany uıymdastyrý aıasynda ótkizilip otyr. Mınıstrlik buıryǵyna sáıkes aýdandyq bilim bóliminiń mindetin atqarýshy arnaıy buıryq shyǵarǵan. Búgingi aqparatqa sáıkes Temirastaý mektebinen 10 balaǵa ótinish túsken. 10 balany tasý úshin mektep eki kólikke usynys berdi, polıtsııaǵa habarlady. Olardy Yrǵyz aýdanyna deıin birge aparýǵa. Biraq jol apatyna ushyraǵan bes oqýshy men muǵalim basqa kólikpen shyqqan. Endi sonyń sebebi anyqtalady», - dedi Aqtóbe oblysy ákiminiń orynbasary Bulbul Eleýsinova.
Aqtóbe oblystyq Bilim basqarmasynyń basshysy Jaıyq Sultannyń aıtýynsha, bir oqýshynyń ata-anasy men júrgizýshi týys bolǵan. Olar ózara kelisýi de múmkin. Jalpy Aqtóbe oblystyq Bilim basqarmasyna qarasty mekemelerde 148 avtobýs bar. Búgingi kúni Yrǵyz aýdany boıynsha Yrǵyz gımnazııasynda ǵana bir avtobýs tirkeýli.
«Jalpy balalardy olımpıadaǵa tasymaldaý máseleleriniń barlyǵy belgilengen buıryqqa sáıkes bilim bólimderine jáne jergilikti jerdegi mektepterdiń basshylaryna júktelgen. Uıymdastyrý kezinde kemshilikter ketip otyr. Jalpy balalardy olımpıada nemese qandaı da bolmasyn shyǵarmashylyq sharalarǵa qatystyrý úshin arnaıy avtobýstar qaralmaǵan. Oblystyq Bilim basqarmasyna qarasty 148 avtobýs mektepterden 3 shaqyrym qashyq turatyn balalardy tasymaldaýǵa ǵana jumyldyrylyp otyr», - dedi Aqtóbe oblysy ákiminiń orynbasary Bulbul Eleýsinova.
Qazirgi kezde eki qylmystyq is qozǵaldy.
«Oqýshylardy tasymaldaý úshin úsh kún buryn suranys berilgen. Kópshiligi aman-esen, tórt kózi túgel jetti olımpıadaǵa. Alaıda Toyota Alphard avtokóligi suranys berilgen kólik tiziminde joq. Qazir QR QK 345-baby 4-bóligi boıynsha is qozǵaldy. Jáne de ekinshi qylmystyq is bar. QR QK 141-baby, ıaǵnı balalardyń ómiri men densaýlyǵyn, qaýipsizdigin qamtamasyz etý jónindegi mindetterdi tıisinshe oryndamaǵany úshin qozǵaldy. Bul qylmystyq is aıasynda qazir jaýapty tulǵalardyń jaýapkershilikteri qaralady. Al júrgizýshi qamaýǵa alynady», - dedi oblystyq PD bastyǵynyń birinshi orynbasary Ardana Saımaǵambetov.
Aıta keteıik, Yrǵyz aýdanyna Aqtóbe oblysynyń ákimi Bulbul Eleýsinova, oblystyq Bilim jáne Densaýlyq saqtaý basqarmalarynyń basshylary barady.
Eske salsaq, aman qalǵan oqýshylardyń jaǵdaıy ortasha aýyr. Bári de aýrýhanada jatyr. Al júrgizýshige psıhologııalyq kómek kórsetildi.
