Aqtóbede olımpıadaǵa bara jatyp, jol apatynan kóz jumǵan oqýshylardyń isi sotqa tústi

AQTÓBE. KAZINFORM – Aqtóbede jol-kólik apaty kezinde kóz jumǵan oqýshylar men muǵalimge qatysty is oblys ortalyǵynda qaralatyn boldy.

Aqtóbe oblystyq soty baspasóz qyzmetiniń habarlaýynsha, Yrǵyz aýdanyndaǵy jol-kólik apatyna qatysty is oblystyq qylmystyq ister jónindegi mamandandyrylǵan aýdanaralyq sotynda qaralady. Aldyn ala tyńdalym 23 aqpan kúni ótedi. 

Eske salsaq, byltyr 19 jeltoqsan kúni Samara — Shymkent tasjolyndaǵy Qyzyljar aýyly mańynda úsh kólik soqtyǵysyp, saldarynan 2 oqýshy men muǵalim oqıǵa ornynda kóz jumdy. 

Oqýshylardy aýdan ortalyǵyna sol mekteptiń muǵalimi ári oqýshynyń aǵasy jeke kóligimen tasymaldaǵan. Qazirgi kezde rýlde bolǵan mektep qyzmetkerine qatysty Qylmystyq kodekstiń 345-baby 4-bóligi, ıaǵnı, «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» babymen is qozǵalyp, tergeý júrdi.