Aqtóbede ólim-jitim týraly jalǵan aqparat taratqan adam izdestirilip jatyr
AQTÓBE. QazAqparat – Aqtóbe polıtsııasy koronavırýs týraly jalǵan aqparat taratqan adamdy izdestirip jatyr, dep habarlaıdy QazAqparat tilshisi.
«Áleýmettik jelilerge monıtorıng júrgizý barysynda WhatsApp messenjerinde «kún saıyn týberkýlez dıspanserinen 50-60 máıit shyǵarylatyny» týraly aqparat taratylǵany anyqtaldy. Bul aqparat shyndyqqa sáıkes kelmeıdi. Aqparat avtoryn anyqtaý boıynsha is-sharalar júrgizilýde» - dedi oblystyq PD-niń orynbasary Qanat Nurmaǵambetov.
Aıta keteıik, jalǵan aqparatty taratqany úshin elimizde qylmystyq jaýapkershilik qarastyrylǵan. Qylmystyq Kodekstiń «Jalǵan aqparatty taratý» baby boıynsha jaza qoldaný kózdelgen.
«Jyl basynan beri jalǵan aqparat taratqany úshin Aqtóbe qalasynyń 3 turǵyny qylmystyq jaýapqa tartyldy. Azamattardy resmı habarlamalarǵa ǵana senýge jáne shyndyqqa sáıkes kelmeıtin qaýeset pen aqparatty taratpaýǵa shaqyramyz», - dedi Qanat Nurmaǵambetov.
