Aqtóbede óli tabylǵan 4 jasar bala úshemniń biri bolǵan

AQTÓBE. QazAqparat - Jumbaq jaǵdaıda mert bolǵan Danıl Ahýnov úshemderdiń biri. Búgin aqtóbelikter balamen qoshtasyp, biraz ýaqyt olar tárbıelengen sábıler úıine Jańa jyldyq tátti syılyqtary men oıynshyqtar ákelip jatyr, dep habarlaıdy QazAqparat tilshisi.

Oqyrmandarǵa túsinikti bolý úshin aıta ketsek, Aqtóbe qalasynda 28 jeltoqsan kúni Danıl Ahýnov joǵalyp, ol týraly balanyń ákesi habarlama berdi. Al búgin onyń mert bolǵany, osy oqıǵa boıynsha is qozǵalǵany belgili boldy. Onyń denesinde zorlyq belgisi bar.

Búgin Aqtóbedegi úshemder biraz ýaqyt tárbıelengen sábıler úıine qoshtasý buryshy ashyldy. Marqum Danıl Ahýnov úsh egizdiń biri.

«28 jeltoqsan kúni áleýmettik jeli arqyly bala joǵalǵanyn estip, eki kún boıy jaqsy habar kúttim. Kórshileri kórdi me, balalarmen oınap ketti me dep oıladym. Keshe de túni boıy jaqsy jańalyqtan úmitimdi úzbedim. Tańerteń kózimdi ashqan boıda eriktilerdiń paraqshasyn qaradym. Sýyq habar keldi. Óz-ózimdi ustaı almaı qaldym. Aqtyq saparyna qoshtasý buryshyn uıymdastyrǵan soń qalanyń eski bóliginen kelip turmyn. Bala úshin eń qaýipsiz oryn ata-anasynyń qushaǵy edi, biraq bul joly olaı bolmady. Qanshama otbasy bala kútip, armandap júr. Al bul otbasy qorǵaı almady. Balalar jyly kóp qaıǵyly oqıǵa boldy. Áleýmettik qyzmet, ıývenaldy polıtsııa, ýchaskelik polıtsııa, ýchaskelik dárigerler bárin qaraýy kerek edi. Úshemder otbasyn osal topqa jatqyzady eken. Arnaıy sala qyzmeti osyny baqylaı almady»,- dedi aty-jónin aıtýdan bas tartqan aqtóbelik áıel.

Aıta keteıik, sábıler úıi ázirge qandaı da bir aqparat berýden bas tartty. Belgilisi Maksım, Danıl, Mılana osynda biraz ýaqyt tárbıelengen. Keıin olardy óz týǵan ákesi tárbıeleýge alyp ketken.

Al eriktiler tobynyń jetekshisi Ekaterına Golotınanyń aıtýynsha, olar bul otbasyna únemi kómektesip júrgen. Bala joǵalǵanda da izdeý jumystaryn polıtsııamen qatar júrgizdi.