Aqtóbede oqýshynyń túrli jaraqaty bar denesi tabyldy

AQTÓBE. QazAqparat – Aqtóbede 12 jastaǵy balanyń denesi tabyldy. Boljam boıynsha ony ıt talap tastaǵan. Oqıǵa Aqtóbe qalasyndaǵy Eset batyr turǵyn úı alabynda boldy, dep habarlaıdy QazAqparat tilshisi.

Oqıǵa 9 maýsym kúni boldy. Aqtóbe oblystyq Polıtsııa departamenti baspasóz qyzmetiniń habarlaýynsha, Eset batyr turǵyn úı alabynyń №3 shaǵyn aýdany aýmaǵynda ornalasqan qurylys nysandarynyń aýmaǵynda 12 jastaǵy balanyń denesi tabyldy.

«Kámelet jasqa tolmaǵan balanyń kóp qan joǵaltý, bastyń, deneniń, qol men aıaqtyń kóptegen jaraqattary túrindegi zorlyqpen ólý belgileri bar máıtiniń tabylý deregi boıynsha qylmystyq is tirkeldi. Aldyn ala boljam boıynsha ólimniń sebebi janýardyń tisteýinen bolýy múmkin. Atalǵan fakti boıynsha birqatar sot-medıtsınalyq saraptama taǵaıyndaldy. Sotqa deıingi tergeý amaldary júrgizilip jatyr», - dep habarlady oblystyq PD baspasóz qyzmeti.

Aqtóbe oblysynyń óńirlik kommýnıkatsııalar qyzmetinde oblys ákiminiń orynbasary Jaqsyǵalı Imanqulov osy oqıǵaǵa qatysty aqparat berdi.

«Bolǵan jaǵdaıǵa baılanysty ata-anasyna baryp, kóńilin surap kelip otyrmyz. Eset batyr turǵyn úı alaby úshinshi shaǵyn aýdanda ornalasqan. Keshe balanyń denesi tabyldy. Qazirgi kezde oblystyq PD tergeý júrgizip jatyr. Sot-medıtsınalyq jáne gıstologııalyq saraptama jasalyp jatyr. Bul 10-15 kúnge sozylady. Oblys ákimi Ońdasyn Orazalın men oblystyq PD bastyǵy isti baqylaýǵa aldy», - dedi oblys ákiminiń orynbasary Jaqsyǵalı Imanqulov.

Aıta keteıik, Aqtóbe qalasy Almaty aýdany Eset batyr turǵyn úı alaby boıynsha bıyl ıtke qatysty 14 habarlama túsken.