Aqtóbede oqýshynyń ólimine qatysy bar taǵy bir kúdikti ustaldy
AQTÓBE. QazAqparat – Aqtóbede oqýshylar tóbelesip, bozbala kóz jumǵan bolatyn. Osy oqıǵaǵa qatysty bar taǵy bir oqýshy ustaldy, dep habarlaıdy QazAqparat tilshisi.
Oqıǵa 2019 jyldyń 10 qarasha kúni boldy. Oqýshylar tóbelesi kezinde bireýi kóz jumdy. Oblystyq PD baspasóz qyzmetiniń jetekshisi Erbolat Sarqulov atalǵan fakti boıynsha Qylmystyq kodekstiń 99 -baby 2-tarmaǵynyń 1, 7, 9, 14 bólimderi boıynsha sotqa deıingi tergeý amaldary júrgizilip jatqanyn málimdedi. Kúdikti retinde kolledj stýdenti ustaldy.
Al búgin tergeý sotynda kúdikke ilikken oqýshyny eki aıǵa qamaý týraly sanktsııa berildi.
«Bul tergeý amaldary oblys prokýrorynyń baqylaýynda. Sondyqtan bul is boıynsha sol jerde bolǵan balalardyń barlyǵy anyqtalyp, olardan jaýap alynyp, tıisti tergeý amaldary júrgiziledi. Ony sotqa jiberetin bolamyz», - dedi Aqtóbe qalasy, Almaty aýdandyq prokýrory Jasulan Dáýlembaev.
Marqum bolǵan Madııar Ismaǵulovtyń anasy balasynyń ólimine kináli barlyq adamnyń jazasyn alǵanyn qalaıdy.
«Sottan ádil sheshim kútemiz. Balamnan aıyrylyp qaldym, al kináli adam tolyq jazasyn alaýy kerek», - dedi anasy Gúlmıra Ismaǵulova.
