Aqtóbede oqýshyny zorlady degen kúdikke ilikken turǵynnan polıtsııa keshirim surady
AQTÓBE. QazAqparat – Aqtóbe oblysy Baıǵanın aýdanynyń turǵyny Nurlan Shandın kýáger retinde tergeýden ótti. Polıtsııa onyń fotosy áleýmettik jelige qalaı tarap ketkenin tekseredi, dep habarlaıdy QazAqparat tilshisi.
Eske salaıyq, Aqtóbede mektep oqýshysyn zorlaǵan kúdikti ustalmaı turyp, áleýmettik jelige Nurlan Shandınniń fotosy tarap ketken bolatyn. Osy oqıǵadan keıin Nurlan Shandın dalaǵa shyǵýdan qalyp, aǵaıyn-týystyń aldynda masqara bolǵanyn aıtady. Qazir atalǵan oqıǵa boıynsha tergeý júrip jatyr.
«12-17 jeltoqsan aralyǵynda Aqtóbe oblystyq Polıtsııa departamentiniń jeke quramy asa aýyr qylmysty ashýǵa jumyldyryldy. Qylmys jasalǵan aýdan tekserilip, kúdiktiniń syrtqy belgileri, ıaǵnı, kıimi, bet pishini boıynsha uqsas adamdar ustaldy. Keıin tekserý maqsatynda polıtsııa bólimine jetkizildi. Kýáger retinde tergeýge alynǵan qala turǵyny Nurlan Shandınnen jaýap alyndy. Onyń qylmysqa qatysy joqtyǵy tekserilip, dáleldengen soń bosatyldy. Syrt kıimi uqsaǵan soń polıtsııaǵa jetkizilgen. Polıtsııa departamentiniń bastyǵy Atyǵaı Arystanov onymen jeke kezdesip, jaǵdaıdy túsindirip, keltirilgen qolaısyzdyqtar úshin keshirim surady», - dep habarlady oblystyq PD baspasóz qyzmetiniń jetekshisi Erbolat Sarqulov.
Aıta keteıik, Nurlan Shandınniń sýretin áleýmettik jelilerde taratqan adamdar anyqtalyp, jaýapkershilikke tartylatyn bolady.
«Men polıtsııa qyzmetkerleriniń aýyr qylmysty ashýmen aınalysqanyn túsinemin, alaıda meniń sýretim áleýmettik jelide tarap ketken. Polıtsııa departamentiniń bastyǵy kinálilerdi taýyp, jazalaıtynyna ýáde berdi», - dedi N.Shandın.
