Aqtóbede oqýshylardyń astan ýlanýy: Ashana ıesine aıyppul salyndy

AQTÓBE. QazAqparat - Aqtóbede mektep oqýshylarynyń astan ýlaný oqıǵasy boıynsha ashanany jalǵa alýshy kásipkerge 325 AEK kóleminde aıppul salyndy, dep habarlaıdy QazAqparat tilshisi.

Aqtóbede №9 mektep-gımnazııasynyń ashanasynan aýqattanǵan balalar ýlanyp, aýrýhanada em qabyldaǵan bolatyn. Keıin kásipkerdiń sanıtarlyq qorytyndy almaı jumys istegeni úshin mektep dırektoryna tártiptik jaza qoldanyldy.

«Aqtóbe qalalyq mamandandyrylǵan ákimshilik sotynda jeke kásipkerge qatysty is qaraldy. Ol QR Ákimshilik quqyqbuzýshylyq kodeksiniń «Tıisti tirkeýsiz, ruqsatsyz nemese habarlama jibermeı kásipkerlik nemese ózge de qyzmetpen aınalysý, sondaı-aq áreketterdi júzege asyrý», «Halyqtyń sanıtarlyq-epıdemıologııalyq salamattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý» baptary boıynsha jaýapqa tartyldy. Kásipkerge 820 625 teńge, ıaǵnı, 325 AKE kóleminde aıyppul salyndy», - dep habarlady sottyń baspasóz qyzmetinen.

Sonymen qatar 10 kún merzimge ashana jumysyn toqtatý sheshimi shyǵaryldy. Sot qaýlysy zańdy kúshine engen joq.