Aqtóbede oqýshylar zamandastaryn emtıhanǵa tegin daıyndap júr
Mektep oqýshylary Arýjan Bıshekenova men Ásııa Taıjanova «Qoǵamǵa qyzmet etý» áleýmettik jobasy aıasynda zamandastaryna dáris berýdi bastady. Qazirgi ýaqytta olar Aqtóbe jáne aýdandarda turatyn kópbalaly, tolyq emes nemese az qamtylǵan otbasylardan shyqqan 40 balany qashyqtan emtıhanǵa daıyndap júr.
«Bilgenińmen bólisýdi durys dep esepteımin. Biz osy arqyly ózimizden jasy kishi, bilimge qushtar oqýshylardy yntalandyramyz. Dáriske qatysqan balalar úzdik mektepterdi tańdap, qatarymyzdan tabyla alady. Bir baıqaǵanym, til úırenýde kedergi az. Bári jeńil meńgeredi. Kóbinese matematıka jáne logıka esebinen qınalady. Sol kezde biz olarǵa taqyrypty qaıta túsindirip, keri baılanys ornatamyz», - dedi Arýjan Bıshekenova.
Ár senbi saıyn birneshe topqa bólingen oqýshylar matematıka, qazaq, orys jáne aǵylshyn tilderin oqıdy.
«Oqý kýrsynyń óz ádistemesi bar. Aldymen matematıka jáne logıka tárizdi sabaqtar ótkizilse, keıin qazaq tili, orys jáne aǵylshyn tiline kezek beremiz. Oqýshylar bir topqa jınalyp, talqylaıdy, suraqtyń durys jaýabyn aıtqan kezde pikir almasady»,- dedi Ásııa Taıjanova. Zııatkerlik mektebiniń oqýshylary muǵalim bolýdyń da qyr-syryn meńgerip júr. Olar úı tapsyrmasyn berip, keıin oqýshylar oryndaǵan jumysty tekseredi
Sonymen birge «KomekTez», «Hand to hand» jobalary arqyly múmkindigi shekteýli balalar matematıka jáne aǵylshyn tili páninen bilimin jetildiredi. Zııatkerlik mektebinde «Kemel Duties» jáne «Ozat English Club» jobalary da bar.
