Aqtóbede oqýshylar astan ýlanyp, mektep dırektory jazalandy
AQTÓBE. QazAqparat - №9 Aqtóbe qalalyq mektep-gımnazııasynyń dırektory Salıha Qazbaevaǵa qatań sógis berildi, dep habarlaıdy QazAqparat tilshisi.
Aqtóbe qalasyndaǵy №9 mektep-gımnazııasynda 20-dan astam oqýshy astan ýlanyp, aýrýhanaǵa tústi. Keıin oblystyq qoǵamdyq densaýlyq saqtaý departamenti ýlaný sebebin anyqtady. Buǵan deıin habarlaǵanymyzdaı, barlyǵy 30 synama alynyp, onyń altaýynan ishek taıaqshasy, ekeýinen S.aureus, ıaǵnı, stafılokokk anyqtaldy. Stafılokokk botqadan, al ishek taıaqshasy taýyq etinen jasalǵan úı sorpasy men irimshik qosylǵan taýyq etinen shyqty. Ashanada 8 adam jumys istese, onyń ekeýinde stafılokokk tirkeldi. Sanıtar mamandar Aqtóbe oblystyq bilim basqarmasy men qalalyq bilim bóliminen kásipkerdiń qujatsyz jumys isteýge ruqsat bergeni úshin dırektorǵa shara qoldaný surady. Búgin baspasóz máslıhatynda dırektordyń jazalanǵany belgili boldy.
«Sanıtarlyq-epıdemıologııalyq qorytyndysyz jeke kásipkerdi ashanaǵa jiberip, jumys isteýge ruqsat bergen mektep dırektory Salıha Qazbaevaǵa «qatań sógis» túrindegi tártiptik jazasy berildi», - dedi Aqtóbe qalalyq bilim bóliminiń basshysy Saıan Súleımenov.
