Aqtóbede oqýshyǵa tátti usynǵan er adamǵa qatysty ákimshilik is qozǵaldy
AQTÓBE. QazAqparat – Aqtóbede beıtanys adam dúken ishinde oqýshyǵa tátti usynyp, keıin ony mektepke izdep barǵan. Ákimshilik quqyqbuzýshylyq týraly Kodekstiń eki baby boıynsha is qozǵaldy, dep habarlaıdy QazAqparat tilshisi.
Oqıǵa Aqtóbe qalasyndaǵy №2 orta mektebinde boldy. Mektep dırektory Sánııa Danıshevanyń aıtýynsha, 19 sáýir kúni 3-synyptyń oqýshysy sabaqqa kele jatyp, dúkenge soǵady. Sol kezde beıtanys er adam oǵan shokolad usynǵan.
«Er adam aty-jónin aıtyp, oǵan shokolad bergen. Ony aǵylshyn tili pániniń muǵalimi baıqap qalǵan. Er adammen mektep aýlasynda sóılesip, oqýshy qyzǵa týystyq qatynasynyń joq ekenin bilgen. Keıin odan mektep aýlasynan shyǵýyn suraǵan. Birden mektep ákimshiligine habarlama berdi. Kezekshi oqýshynyń ata-anasyn shaqyrdy. Sodan soń ekinshi aýysymdaǵy balalardyń ata-analarynan balalaryn tek ózderi alýyn suradyq. Sonymen birge, synyp jetekshileri men ata-analardyń muqııat bolýy úshin qaýipsizdik kúsheıtilip, buıryq shyǵaryldy. Aqparat mektep ınspektoryna habarlandy. Ata-analary bir kún ótken soń polıtsııaǵa aryz jazdy», - dedi Sánııa Danısheva.
Aıtýynsha, er adam mektepke kelgen soń, keshkilik ata-analarmen birge aýla ishinde kútip turǵan.
Aqtóbe oblystyq polıtsııa departamenti osy oqıǵadan soń ákimshilik is qozǵalǵanyn habarlady.
«QR Ákimshilik quqyqbuzýshylyq týraly kodekstiń 449 jáne 517-baptary boıynsha qoǵamdyq orynda kámeletke tolmaǵan balaǵa tıisý deregi jáne QR Kóshi-qon zańnamasyn buzǵany úshin 1961 jylǵy er adamǵa ákimshilik is qozǵaldy. Budan ári sot sheshimi qabyldanǵan soń, memleket shekarasynan shyǵarý sharasy qarastyrylady. Onyń aıtýynsha, 19 sáýir kúni qaıtys bolǵan ákesin eske alý kúni dúkende kámeletke tolmaǵan qyz balaǵa tátti usynǵan, keıin mektepke baryp, oǵan óz qolymen salǵan sýretterdi bermek bolǵan», - dep habarlady oblystyq PD baspasóz qyzmetiniń jetekshisi Erbolat Sarqulov.
Atalǵan orta mektepte 1500 bala oqıdy. Munda 11 syrtqy, 13 ishki kamera bar.
«Mundaı jaǵdaı anyqtalǵannan keıin qalalyq bilim bólimi barlyq mekemege habarlaıdy. Qaladaǵy mektepterdiń bárinde kamera bar, kúzet mekemelerimen kelisimshart jasalǵan. Mektep aýlasynan bógde adam kórse, birden habarlama beredi. Bul - algorıtm. Mektep ákimshiligi anyqtaıdy, ata-anaǵa habarlasady. Taǵy da mektep ákimshilikterine muqıat bolýdy eskertip otyrmyz», - dedi Aqtóbe qalalyq bilim bóliminiń basshysy Metgúl Qosymbaeva.
Aıta keteıik, Astanada jas qyzǵa tıisken kúdikti avtobýstaǵy kameralardyń kómegimen ustaldy.
