Aqtóbede oqýshy óliminen soń polıtsııa bastyǵy ata-analarmen jınalys ótkizdi
AQTÓBE. QazAqparat - Aqtóbe oblystyq polıtsııa departamentiniń bastyǵy Atyǵaı Arystanov ata-analar men mektep ınspektorlaryn jınap, tárbıe máselesin qozǵady, dep habarlaıdy QazAqparat tilshisi.
Mektep dırektorlary, ata-analar men polıtsııa qyzmetkerleri jasóspirimder arasyndaǵy qylmysty talqylady. Oblystyq polıtsııa departamentiniń bastyǵy Atyǵaı Arystanov bir-birine habar berip, balalar tárbıesinde aqyldasa otyryp sheshim qabyldaýǵa shaqyrdy.
«Bul tek polıtsııa qyzmetkerleriniń ǵana jumysy emes. Ata-analar beıqam júr. Sońǵy oqıǵada ata-ana úı aýlasynda turǵan kólikti kámelet jasqa tolmaǵan balasynyń aıdap ketkenin kórmeı qaldy. Sonymen qatar jol-kólik oqıǵasy alańdatyp otyr. Barlyǵy 134 kólik oqıǵasy kezinde jasóspirim zardap shekken bolsa, altaýy kóz jumdy», - dedi Aqtóbe oblystyq polıtsııa departamentiniń bastyǵy Atyǵaı Arystanov.
Oblystyq jergilikti polıtsııa qyzmeti basqarmasynyń bastyǵy Ardana Saımaǵambetovtyń aıtýynsha, oblysta jasóspirimder 112 qylmys jasaǵan. Onyń úsheýi adam óltirdi.
«Densaýlyqqa aýyr jáne orta dárejede zııan keltirgen 7, urlyqtyń 37, alaıaqtyq 6, bopsalaý bireý, buzaqylyq 17 derek. Qylmys jasaǵandardyń 28-i mektep oqýshysy, 63-i kolledj, 4-i JOO stýdenti», - dedi Ardana Saımaǵambetov. Onyń aıtýynsha, qylmys jasaǵandardyń 52 paıyzy jaǵdaıy jaqsy otbasynda tárbıelengen. Kóbi buryn qylmys jasamaǵan.
«Oblysta kámeletke tolmaǵandar isteri jónindegi 111 mektep ınspektory bar. Olar 442 bilim berý mekemesin baqylaıdy. Bir ınspektorǵa úsh mektepten kelip tur. Taǵy 125 ınspektor qajet», - dedi Ardana Saımaǵambetov.
Aıta keteıik, Aqtóbede oqýshylar tóbelesip, bireýi kóz jumdy.
