Aqtóbede oqýshy qyz óz anasyn óltirdi degen kúdikpen ustaldy

AQTÓBE. QazAqparat - Aqtóbede 16 jastaǵy mektep oqýshysyna qatysty qylmystyq is qozǵaldy. Ol anasyn óltirdi degen kúdikke ilikti, dep habarlaıdy QazAqparat tilshisi.

Oqıǵa Aqtóbe qalasynda boldy. Qazirgi kezde Qylmystyq istiń «Adam óltirý» baby boıynsha is qozǵalyp, 16 jastaǵy qyz ben onyń 19 jastaǵy tanysy kúdikke ilikti. Oblystyq PD baspasóz qyzmetiniń habarlaýynsha, sot aldy tergeý bastalyp, kúdiktiler ýaqytsha qamaldy. Al oblystyq bilim basqarmasy basshysynyń orynbasary Nurgúl Bertileýova kúdikti qyzdyń tolyq emes otbasynda tárbıelenip jatqanyn aıtty.
«Anasy vahtalyq ádispen saýynshy bolyp jumys istegen. Bala asa bir beıádep árekettermen kózge túspegen. Biraq anasy birneshe ret balany qaraýsyz qaldyryp, soǵan baılanysty kámeletke tolmaǵandardyń isteri jónindegi komıssııa otyrysyna shaqyrylǵan, eskertý jasalǵan. Bala salmaqty, artyq is-áreketteri buǵan deıin baıqalmaǵan. Іshki ister organdarynyń esebinde bolmaǵan. Tek saǵat 23:00-den keıin kóshede júrip, osy talapty buzǵany úshin birneshe ret eskertý alǵan. Janynda dos balasy bolǵan. Ol kámelettik jasqa tolǵan jigit. Qaladaǵy kolledjderdiń biriniń stýdenti. Qazir qaısysy kináli ekenin bilmeımiz, naqty anyqtalǵan joq»,- dedi oblystyq bilim basqarmasy basshysynyń orynbasary Nurgúl Bertileýova.
Qylmystyq iske qatysty tergeý júrip jatqan soń ózge aqparat taratylmady.