Aqtóbede oqýshy eki qolynan aıyrylǵan soń transformatorlar qorshaýǵa alynatyn boldy
AQTÓBE. QazAqparat - Aqtóbe oblysynda transformatorlar túgendelip jatyr. Qazir qalada 379 transformator ashyq-shashyq tur, dep habarlaıdy QazAqparat tilshisi.
Aqtóbe oblysy Shalqar qalasynda mektep oqýshysy transformatorǵa kirip, eki qolynan aıyryldy. Oqys oqıǵadan soń oblysta transformatordy túgendeý, ıesin anyqtaý jumysy júrip jatyr.
«Aqtóbe oblysy boıynsha 1700 transformator bar. Aqtóbe qalasynda 473 transformator bolsa, onyń 92-si qorshaýly tur. Ózgesi qorshaýsyz. Al mektep janynda 29 transformator bar. Bári qorshaýly, talapqa saı, qaýipsizdik belgisi ornatyldy. Al qalalyq turǵyn úı-kommýnaldyq sharýashylyǵynda mektep, balabaqsha janynda turǵan 17 trasformatorǵa jaýapty. Onyń tek tórteýi qorshaýly eken», - dedi «Energosıstema» JShS-niń bas dırektory Marat Amanǵalıev.
Aqtóbe qalasynda qorshalmaǵan, tipti, jeke adamnyń aýlasynda turǵan trasformatorlar da bar. Qazir arnaıy mekeme olardy aýladan shyǵaryp, qorshaýǵa alyp jatyr. Degenmen bul talapty oryndaýǵa múmkindik bolmaıtyn jaǵdaılar kezdesedi.
«Joldyń jıegindegi transformatordy qorshaı almaımyz. Ony qorshap qoısaq, jol júrisine kedergi bolady. Bárin birdeı baqylaýda ustaı almaımyz, keıde baspanasy joq adamdar jylynýǵa kirip ketip jatady. Urlyq ta órship tur. Túrli-tústi metall úshin symdy kesip alyp ketedi. Úlken ortalyqtarda arnaıy belgi beretin qondyrǵy bar. Al shaǵyn stantsııalarǵa kirse, bilmeımiz. Tek jaryq sóngende urlyq bolǵany anyqtalady. Barlyq transformatordy qorshaý úshin 55 mıllıon teńge aqsha kerek», - dedi Marat Amanǵalıev.
Aqtóbe qalalyq ákimdigi ıesiz qalǵan transformatorlardy anyqtap, tekseredi. Arnaıy top jumysyn bastady.
«Búgingi kúni oblys ákimi Berdibek Saparbaevtyń tapsyrmasy boıynsha qala aýmaǵynda ashyq turǵan transformatorlardy anyqtaý jumysy júrip jatyr. Eń aldymen mektep, balabaqshaǵa jaqyn turǵan transformatorlar qorshalady. Qazirgi kezde turǵyn úı-kommýnaldyq sharýashylyq bólimi 13 transformatordy anyqtady. Bıýdjetten qarjy bólinse, qorshalady. Jumys toby saıajaı aýmaǵyn da qaraıdy. Iesiz transformatorlar anyqtalsa, qalanyń balansyna alynýy múmkin», - dedi qala ákimi apparaty óndiristik sala bóliminiń jetekshisi Bekzat Turǵalıev.
