Aqtóbede oqýshy dosynyń aıaǵyna pyshaq suǵyp aldy
AQTÓBE. QazAqparat - Aqtóbe qalasyndaǵy №38 orta mektep oqýshysy janyndaǵy dosynyń aıaǵyna pyshaq suǵyp alǵan, de habarlaıdy QazAqparat tilshisi.
Jalpy oqıǵa 6 naýryzda bolǵan. Alaıda, ata-analar ózara kelisip, polıtsııaǵa shaǵym túsirmepti. Sondyqtan da bul jaıttyń mán-jaıy endi ǵana belgili bolyp otyr.
Aqtóbe qalasyndaǵy №38 orta mektepte qazir balalarǵa tárbıe saǵaty ótip jatyr. Olardyń quqyqtyq saýattylyǵyn arttyrý, ata-analardyń baqylaýyn kúsheıtýge mektep oqýshysynyń tosyn áreketi túrtki boldy. 5 synyp oqýshysy sabaqtan shyǵyp, úıine bara jatqan jolda janyndaǵy joldasynyń aıaǵyna keńse pyshaǵyn suǵyp alǵan.
«11 jastaǵy balalar bir-birine kórshi turady. Ata-analary da bir-birin tanıdy. Ózara tatýlasyp, polıtsııaǵa shaǵym túsirgen joq. Birer kún em qabyldaǵan oqýshy sabaqqa kelip júr. Bizdiń mektepte eshqandaı qylmystyq oqıǵa tirkelgen emes. Qazaq orta mektebinde bilim alatyn balalardyń kóbi áleýmettik jaǵdaıy tómen otbasynda turady. Olar mektep janyndaǵy jataqhanalardyń turǵyndary. Shynyn aıtqanda, bizde buzyq bala joq. Keshegi jaǵdaı úshin de qıyn boldy. Atalǵan oqıǵa boıynsha ata-analarǵa quqyqtyq keńes berildi»,- dedi №38 orta mektep dırektory Nazgúl Hasen.
