Aqtóbede oqýshylar jattyǵatyn muzaıdyn isten shyqty

AQTÓBE. KAZINFORM – Aqtóbedegi balalar jáne jasóspirimder sport mektebiniń muzaıdyny sýǵa aınaldy. Munda jylý almastyrǵysh qurylǵy isten shyǵyp, ata-analar narazylyq bildirdi.

«Olımp» balalar jáne jasóspirimder sport mektebinde byltyr muzdatqysh isten shyqqan bolatyn, bul jaǵdaı bıyl da qaıtalandy. Bul joly jylý almastyrǵysh qurylǵy iske jaramaı qalǵan.

- Meniń qyzym 5 jastap bastap mánerlep syrǵanaýmen shuǵyldanady. Qazir jasy 10-da. Jyl saıyn osy jaǵdaı qaıtalanady. Qysta 2-3 aı muzdatqysh qurylǵy istemeı qalady. Jazda bolsa biz 3 aı demalysqa shyǵamyz. Biz úshin eńbektiń óteýi kerek. Al olar bolsa osyndaı kedergilerdiń kesirinen durys nátıje kórsete almaıdy. Taıaýda ǵana Oral qalasynda ótken jarysqa qatysyp keldi. Ózge óńirden kelgen zamandastaryna qarap jylaǵym keldi. Bizde tómen, nátıje az. Jóndeý memlekettik satyp alý arqyly ótedi deıdi. Balalar aılap kúte bereme me,- dedi ata-ana Gúlsim Bekeǵulova.

Al Mánerlep syrǵanaý federatsııasynyń Aqtóbedegi prezıdenti Altynaı Tańbaevanyń aıtýynsha, byltyr da qańtar aıynda dál osyndaı jaǵdaı bolyp, muz sýǵa aınaldy. Jóndeýge aqsha bólinip, qalpyna kelgenshe úsh aı ótip, balalar sáýirde ǵana muz aıdynynda qaıta jattyǵý júrgizgen.

- Byltyr úsh aı jattyǵý bolmady. Bıyl da balalar bos qaldy. Qazir tek zalda ǵana jattyǵý jasaımyz. Onyń ózi de durys jabdyqtalmaǵan. Aldaǵy ýaqytta jarystar bar, oǵan qalaı daıyndalatynymyzdy, tipti qalaı baratynymyzdy bilmeımiz. Byltyr buzylyp, jóndelgende 5 jylǵa kepildik bergen edi. Bıyl ne bolǵanyn bilmeımiz, - dedi Altynaı Tańbaeva.

«Olımp» balalar jáne jasóspirimder sport mektebi dırektorynyń oqý isi jónindegi orynbasary Aqmaral Orynbasardyń aıtýynsha, mektepte jylý almastyrǵysh qurylǵysy isten shyqty.

- Jylda osy jaǵdaı qaıtalanyp otyr. Byltyr kompressor aýystyryldy. Qazirgi kezde eki kompressor da qosylady, biraq qural-jabdyq tolyq jumys isteı almaı tur. Buǵan deıin eki ınjener jumys istedi. Olardyń jumysy durys bolmaı, qazir ózgerlerine qaratyp aldyq. Qansha qarjy kerek ekenin bilmeımiz. Qansha ýaqytqa sozylatynyn da aıta almaımyz,- dedi Aqmaral Orynbasar.

Ázirge tek dene jattyǵýy júredi. Sonymen birge esik aldyna muz qatyryp, amaldaı turmaq.

Aqtóbe oblystyq dene shynyqtyrý jáne sport basqarmasynyń habarlaýynsha, muzaıdynda jylý almastyrǵysh isten shyqqan. Ony demeýshiler esebinen jóndeýi múmkin. Jóndeý quny shamamen 6-8 mln teńge bolady. Al oǵan deıin qaladaǵy jeke muzaıdyn saraıymen kelisim júredi.

Aıta keteıik, munda 338 bala bar. Olar mánerlep syrǵanaý, short-trek, shaıbaly hokkeımen shuǵyldanady.

Eske salsaq, bıyl Qonaev qalasynda B.Soqpaqbaev atyndaǵy Ortalyq saıabaq mańynda muzaıdyny ashyldy.