Aqtóbede oqýshylar mert bolǵan jol apatyna qatysty sot otyrysy bastaldy

AQTÓBE. KAZINFORM – Aqtóbe oblystyq qylmystyq ister jónindegi mamandandyrylǵan aýdanaralyq sotynda olımpıadaǵa barar jolda jol-kólik oqıǵasyna tap bolyp, kóz jumǵan oqýshylarǵa qatysty istiń aldyn ala tyńdalymy ótti.

Oqıǵa «Samara-Shymkent» tasjolynyń Yrǵyz aýdany aýmaǵynda tirkelgenimen, is Aqtóbe oblystyq qylmystyq ister jónindegi mamandandyrylǵan aýdanaralyq sotynda qaralady. Búgin aldyn ala sot tyńdalymy ótti. Onda prokýror Aslanbek Ibrashev aıyptaý qorytyndysyn oqydy.

Іs materıalyna súıensek, Temirastaý mektebiniń muǵalimi, júrgizýshi 2023 jyldyń 19 jeltoqsany kúni saǵat 08:30–da Janys bıden Yrǵyz aýylyna qaraı bet alady. Aýa raıy men meteorologııalyq jaǵdaıdy eskermeı, Samara-Shymkent tasjolynyń 1140 shaqyrymynda joldyń qarsy baǵytyna arnalǵan jolaqqa shyǵyp ketedi. Sol kezde qarsy kele jatqan júk kóligimen soqtyǵysady.

— Jol-kólik oqıǵasy kezinde 2008 jyly týǵan oqýshy aýrýhanaǵa tústi. 1998 jyly týǵan muǵalim, 2008 jyly týǵan oqýshy qyz, 2007 jyly týǵan er bala jol-kólik oqıǵasynan oqıǵa ornynda qaıtys boldy. 1998 jyly týǵan týǵan muǵalim bas jaraqatynan qaıtys bolǵan. Bul qatty aýyr soqqydan bolýy múmkin. 2007 jyly týǵan er balanyń basy julynyp ketken. 2008 jyly týǵan oqýshy qyz jaraqat áserinen travmatıkalyq shok alyp, qaıtys bolǵan, — dedi prokýror.

Jol-kólik oqıǵasynan soń úsh kólikke de saraptama taǵaıyndaldy. Sonymen birge júk jáne taǵy bir jeńil kólik zaqymdandy. Sot otyrysyna aıyptalýshynyń týystary, jábirlenýshiniń jaqyndary qatysty.

— Janys bı aýylyndaǵy qarashańyraqta otyrǵan Saırannyń apasymyn. Qaıtys bolǵan balalardyń úsheýi — aǵaıyndy. Rýlde otyrǵan Saırannyń uly. Bul úsh shańyraqqa da qıyn synaq boldy. Jol qatelikti keshirmeıdi. Alla synaq berdi, sony kóterip jatyrmyz. Rýlde otyrǵan inimizge jeńildik berse deımiz. Qamaýda otyrǵanda, Yrǵyzda eshkim ony kóre almady. Ákesi ǵana qorǵaýshy retinde kirip shyqty. Psıholog jaldap, inimizge kómektesýge týra keldi. Ol ómir súrgisi kelmedi, óz-ózine qol salmaq boldy. Janynda otyrǵany óz dosy, al kóz jumǵan týǵan qaryndasy. Óte aýyr boldy. Psıhologke qaryndasyn bir ret, al dosyn qaıta-qaıta aıtqan. Ekeýi qatar júrdi. Oqý bitirgen soń «aýyldan birge bastaımyz» dep bardy. Bes jyl boldy, ekeýi de sol mekteptiń muǵalimi. Qaıtys bolǵan bala mekteptiń juldyzy boldy, — dedi Gúlbaný Shamshadınqyzy.

Eske salsaq, Samara-Shymkent tasjolyna jol-kólik oqıǵasy bolyp, eki oqýshy men muǵalim kóz jumdy.