Aqtóbede oqýshylar kolledj stýdentterimen tóbelesip, pyshaq jaraqatyn aldy
AQTÓBE. KAZINFORM – Aqtóbede pyshaq jaraqatyn alǵan oqýshylardyń ata-analary oblystyq prokýratýraǵa baryp, tergeý jumystarynyń baıaý júrip jatqanyna shaǵymdandy. Qazirgi kezde Qylmystyq kodekstiń «Buzaqylyq» baby boıynsha is qozǵalyp, tergeý júrip jatyr.
Oqıǵa 2 qazanda bolǵan. Aqtóbe qalasyndaǵy № 23 orta mektep ata-analarynyń aıtýynsha, kolledjdiń bir top stýdenti fýtbol oınap júrgen balalardy uryp, pyshaqtap ketken.
— Mektep aýlasynda balalar fýtbol oınap júredi. Alǵashynda bir top jigittiń júrigip kele jatqanyn, keıin onyń sońynan taǵy bir toptyń qýǵanyn ańǵarady. Az ýaqyttan keıin bir toby bizdiń balalarǵa kelip, tıisken. Fýtbol alańyna kirip, pyshaq kórsetken. Oqýshy ıterip jibergen, sol jerde tóbeles bastalady. Balam úsh jerinen pyshaq jaraqatyn aldy. Jambasy zaqymdandy. Qazir aýrýhanadan shyqty, sabaqqa qatysyp júr. Arada qansha ýaqyt ótkenimen is bir orynnan jyljymaı tur. Ekeýin qamaǵan, bireýi úıqamaqta. Biz istiń ádil tergelgenin qalaımyz, — dedi jábirlenýshiniń anasy Shynar Baltabekova. Sondaı-aq Sara Qojanovanyń balasy da pyshaq jaraqatyn alǵan.
Taǵy bir jábirlenýshiniń anasy Sara Qojanovanyń aıtýynsha, buzaqylar balalardyń fýtbol oınap jatqan jerine kelip, tıisip, pyshaqpen qorqytqan. Meniń balamnyń jambasyna pyshaq salǵan. Polıtsııa men jedel járdem tez keldi. Tek isti tergeý baıaý júrip jatqan kórinedi.
Polıtsııa osy oqıǵadan keıin Qylmystyq kodekstiń «Buzaqylyq» baby boıynsha is qozǵap, tergeý júrgizip jatyr.
— Aqtóbe qalasynda fýtbol oınap jatqan jastar men sol jerden ótip bara jatqan jigitter arasynda janjal týyndap, nátıjesinde 2 jas bala jambas aımaǵynan pyshaq jaraqatyn alyp, medıtsınalyq mekemege júgindi. Oqıǵaǵa qatysýshylar anyqtalyp, polıtsııa bólimine jetkizildi. Buzaqylyq faktisi boıynsha sotqa deıingi tergep-tekserý bastaldy. Eki kúdikti ýaqytsha ustaý ızolıatoryna qamaldy. QR QPK 201-babynyń tártibinde ózge aqparat jarııa etilmeıdi, — dep habarlady Aqtóbe oblystyq PD baspasóz qyzmeti.
Eske salsaq, qyrkúıekte Temir aýdany Qopa aýylynda oqýshy kóz jumdy. Munda joǵary synyp oqýshylary kúdikke iligip, qamaldy.
