Aqtóbede oqýshylar densaýlyǵyn teksergen dárigerler áreketinen buzýshylyq anyqtalmady

AQTÓBE. KAZINFORM - Aqtóbe oblysynda medıtsınalyq tekserý júrgizgen dárigerlerdiń jumysy saralandy. Komıssııa buzýshylyq anyqtamady. 

Aqtóbe oblysynda ata-analar medıtsınalyq tekserý kezinde dárigerlerdiń qolǵap aýystarmaǵanyn aıtyp, shaǵymdandy. Keıin Aqtóbe oblystyq densaýlyq basqarmasynda komıssııa quryldy. Komıssııa quramyna basqarmanyń bólim basshysy, shtattan tys bas pedıatr, zańger, emhananyń bólim meńgerýshisi endi.

— Medıtsınalyq tekserýdiń barlyq kezeńine tekserý júrgizildi. Uıymdastyrýdan bastap mamandardyń daıyndyǵy men olardyń balalardy qaraý tártibi eskerildi. № 14 mekteptegi medıtsınalyq tekserý kezinde № 5 emhana qyzmetkerleriniń uıymdastyrý-ótkizý jumysy kezinde buzýshylyq anyqtalmady, - dep habarlady Aqtóbe oblystyq densaýlyq saqtaý basqarmasynyń baspasóz qyzmeti.

Barlyǵy 340 bala medıtsınalyq tekserýden ótýi tıis boldy. Sol kezde 184 oqýshy tekserildi. Teń jartysy 10-11 synyp oqýshylary bolsa, qalǵany — 12-13 jastaǵy jasóspiririm. 

Eske salsaq, Aqtóbede ata-analar balalaryn mekteptiń májilis zalyna jınap, medıtsınalyq tekserýden ótkizgen ujymnyń áreketin synǵa aldy. Tipti qolǵapty aýystyrmaǵanyn aıtty. Keıin birden komıssııa qurylyp, dárigerler jumysy saralandy.