Aqtóbede oqýshylar áleýmettik jelidegi pikirden soń tóbelesip qaldy
AQTÓBE. KAZINFORM – Aqtóbeniń Shalqar qalasynda mektep oqýshylary ózara janjaldasyp qaldy. Olardyń bári polıtsııa bóliminine jetkizilip, shara qabyldaý úshin aýdan ákimi janyndaǵy kámeletke tolmaǵandardyń isteri jáne olardyń quqyqtaryn qorǵaý jónindegi komıssııaǵa joldandy.
Áleýmettik jelide oqýshylardyń bir-birin qýyp júrgen vıdeosy tarap ketti. Oqıǵa 18-naýryz kúni saǵat shamamen 14:00-de Shalqar qalasynda boldy. Bul Áıteke bı men Jeltoqsan kósheleriniń qıylysy mańy. №5 mektep-lıtseıdiń oqýshylary men №3 Shalqar qalalyq orta mektep oqýshylary qoǵamdyq tártipti buzǵany úshin polıtsııaǵa jetkizildi.
- Tekserý kezinde №5 mektep-lıtseıdiń 8 «A» synyp oqýshysy óz fotosyn mýzykamen súıemeldep, keıin TikTok jelisine júktegeni belgili boldy. Sol mekteptiń 9 «B» synyp oqýshysy qoqan-loqy kórsetip, vıdeony óshirýdi talap etip, pikir qaldyrady. Sol kezde 8-synyp oqýshysy 10-synypta oqıtyn aǵasyna mán-jaıdy aıtady. 18-naýryz kúni №5 mektep-lıtseıdiń 9-10 synyp oqýshylary sabaqtan soń kezdesetinin aıtady.
Al balalardyń biri №3 orta mektepte oqıtyn oqýshylardan kómek suraıdy. Atalǵan oqıǵaǵa qatysqan jasóspirimder anyqtalyp, aýdandyq polıtsııa bólimine jetkizildi, - dep habarlady Aqtóbe oblystyq Bilim basqarmasy.
Aqtóbe oblystyq PD baspasóz qyzmetiniń jetekshisi Erbolat Sarqulovtyń habarlaýynsha, qujattar jınaqtalyp, sheshim shyǵarý úshin is Shalqar aýdany ákimi janyndaǵy kámeletke tolmaǵandardyń quqyqtaryn qorǵaý jónindegi komısııaǵa joldanady.
