Aqtóbede oqýshy mektepte benzın ıisi bar suıyqtyq iship, aýrýhanaǵa tústi
AQTÓBE. KAZINFORM – 1-synyp oqýshysy aýrýhanadan em qabyldap, úıine shyqty. Al oblystyq Bilim basqarmasy arnaıy komıssııa qurdy.
Oqıǵa Aqtóbe oblysy Qobda aýdanynyń Isataı Taımanov atyndaǵy gımnazııasynda boldy. 15mamyr kúni oqýshy úziliske shyǵyp, mekteptiń jertólesine túsedi. Sol kezde suıyqtyqty iship qoıǵan. Bul másele áleýmettik jeli arqyly jarııalanyp, muǵalimderdiń keshirim de suramaǵany aıtyldy.
- Aýzynan jaǵymsyz ıis shyqqan soń apaıy bolǵan jaıdy suraıdy. Bala bárin kórsetip, aıtyp beredi. Biraq apaıy jaǵdaıy jaqsy dep, odan ári sabaqta qaldyrady. Mektep meıirbıkesine eskertilmegen. Sabaq aıaqtalǵan soń úıine óziniń velosıpedimen qaıtaryp jiberedi jáne anasyna qońyraý shalyp, bolǵan oqıǵany aıtyp, eskertedi. Úıge kelgen soń bala birneshe ret qusady. Anasy óz betimen aýrýhanaǵa aparǵan. Aýrýhanada asqazanyn jýdyryp, odan ári Aqtóbedegi oblystyq aýrýhanaǵa jetkizedi. Osy ýaqytqa deıin mektep turǵysynan da, bilim bólimi jaǵynan da eshqandaı shara qoldanylmaı otyr. Ata- anasyna baryp keshirim de suralmaǵan, - dep jazylǵan áleýmettik jelide.
Rasymen de 2019 jyly týǵan bala benzın ıisi bar suıyqtyqty abaısyzda iship, aýrýhanaǵa jetkizilgen.
- Balaǵa medıtsınalyq kómek der kezinde kórsetildi. Oblystyq balalar aýrýhanasynda em qabyldap, dárigerler baqylaýynda bolǵannan keıin jaǵdaıy turaqtaldy. Qazirgi ýaqytta ómirine qaýip joq, qanaǵattanarlyq jaǵdaıda úıine shyǵaryldy. Oqıǵanyń mán-jaıyn anyqtaý maqsatynda oblystyq Bilim basqarmasy arnaıy komıssııa qurdy,- dep habarlady oblystyq Bilim basqarmasy.
Aıta keteıik, Aqtóbede páter men kottedjge jınalǵan mektep túlekteriniń ata-analary jaýapqa tartyldy. Túlekter páter jaldap, saýyq-saıran qurǵan. Polıtsııa kólik júrgizgen túlekti de jaýapqa tartty.
