Aqtóbede oqýshy qyzǵa seksýaldyq zorlyq kórsetti degen kúdikpen er adam ustaldy
AQTÓBE. KAZINFORM – Oqıǵa Hromtaý qalasynda bolǵan. Qazirgi kezde 14 jastaǵy oqýshy qyzǵa azǵyndyq jasady degen kúdikpen 25 jastaǵy jigit qamaldy.
Aqtóbe oblystyq PD baspasóz qyzmetiniń habarlaýynsha, qylmystyq is qozǵaldy. Kúdikti dereý ustalyp, ýaqytsha ustaý ızolıatoryna qamaldy.
– Qazirgi ýaqytta qajetti tergeý jáne protsestik is-áreketter kesheni júrgizilip jatyr. Qylmystyq protsess qatysýshylarynyń barlyq dáleli tekserilip, aıǵaqtar jınalyp jáne taldanady. Tergeý organdary istiń barlyq mán-jaıyn muqııat anyqtap, zerdelep jatyr. Tolyq ári jan-jaqty tergeý qorytyndysy boıynsha zańdy jáne negizdelgen protsestik sheshim qabyldanady. Tergeý múddesine sáıkes, sondaı-aq kámeletke tolmaǵannyń quqyqtary men zańdy múddelerin qorǵaý maqsatynda ózge aqparat jarııa etýge jatpaıdy, - dep habarlady Aqtóbe oblystyq PD baspasóz qyzmeti.
Buǵan deıin habarlaǵanymyzdaı, Aqtóbe oblysy Temir aýdanynda mektep oqýshysy júkti bolyp, qylmystyq is qozǵaldy. Jasóspirim qyz birneshe ret túngi reıd kezinde ustalǵan.
