Aqtóbede oqýshy qyzdar arasyndaǵy janjaldan soń ákimshilik is qozǵaldy

AQTÓBE. KAZINFORM – Aqtóbe qalasynda oqýshy qyzdyń zamandasyna álimjettik jasap turǵan sáti vıdeoǵa túsip qalyp, keıin ol áleýmettik jeli arqyly tarap ketti. Polıtsııa oqýshylardyń jeke basyn anyqtap, ákimshilik is qozǵaldy. 

Oqıǵa 10-shilde kúni Aqtóbe qalasynyń ortalyǵynda bolǵan. Beınematerıaldan bir qyzdyń ekinshi bir qyzdy ishinen, jambasynan tepkilep, balaǵattap jatqanyn kórýge bolady.  

Polıtsııa oqıǵaǵa qatysy bar qyzdardyń kim ekenin anyqtady.

– Janjalǵa qatysqandar men olardyń ata-analary polıtsııa bólimine jetkizildi. Kámelet jasqa tolmaǵan qyzdyń ata-anasyna Ákimshilik quqyqbuzýshylyq týraly kodekstiń 345-baby boıynsha ákimshilik is qozǵaldy. Qyz da, onyń anasy da kinásin tolyq moıyndady. Іs sotqa jiberiledi. Sonymen birge qyzdar oqıtyn mektep dırektory men onyń orynbasary shaqyrtylyp, túsindirý jumysy júrgizildi. Ákimshilik quqyqbuzýshylyq qaıtalanbas úshin eki aradaǵy janjal sebebi joıylýy tıis, - dep habarlady oblystyq PD baspasóz qyzmetiniń jetekshisi Erbolat Sarqulov.

Eske salsaq, buǵan deıin Astanada jappaı tóbeleskenderge qatysty qylmystyq is qozǵalǵanyn jazǵan edik.