Aqtóbede oqýshy qyz bosanǵannan keıin qylmystyq is qozǵaldy

AQTÓBE. KAZINFORM — Oqýshy qyz úsh ret medıtsınalyq tekserýden ótkenimen birde-birinde onyń júkti ekeni anyqtalmaǵan. Polıtsııa qazir tergeý júrgizip jatyr.

Oqıǵa Aqtóbe oblysy Oıyl aýdanynda tirkeldi. Oqýshy bosanyp, polıtsııa tergeýdi bastady. 

— Atalǵan fakti boıynsha polıtsııa tarapynan qylmystyq is qozǵaldy. Kúdikti tulǵa anyqtalyp, qamaýǵa alyndy. Qazirgi ýaqytta oqıǵanyń barlyq mán-jaıyn, sondaı-aq quqyq buzýshylyqtyń jasalýyna yqpal etken sebepter men jaǵdaılardy anyqtaýǵa baǵyttalǵan sotqa deıingi tergep-tekserý júrip jatyr. Keshendi tergeý jáne is júrgizý sharalary júzege asyrylady. Іstiń barysy polıtsııa departamenti basshylyǵynyń baqylaýynda, — dedi Aqtóbe oblysy PD bastyǵynyń orynbasary Bolat Kóshqalıev.

Oqýshy qyz bıyl naýryz, mamyr jáne qyrkúıek aılarynda medıtsınalyq tekserýden ótken. Ol kezde júkti ekenin anasy da, medıtsına qyzmetkerleri de bilmedi.

— Oıyl aýdandyq orta mekteptiń 9-synyp oqýshysy qazir medıtsınalyq mekemede jatyr. Kámeletke tolmaǵan balaǵa qatysty ózge aqparat ýákiletti organdardyń quzyretine jatady jáne balanyń quqyqtary men zańdy múddelerin qorǵaýǵa baǵyttalǵan zańnama talaptaryna sáıkes jarııa etilmeıdi, — dep habarlady Aqtóbe oblystyq bilim basqarmasynyń baspasóz qyzmeti.

Buǵan deıin habarlaǵanymyzdaı, Qazaqstanda jasóspirimder orta eseppen 15-19 jas aralyǵynda erte jynystyq qatynasty bastaıtyny anyqtaldy. Qatynasqa túsken jasóspirimderdiń 16,7%-y keminde bir ret júkti bolǵan. Sonyń ishinde — 62%-y bosanǵan, 22%-y — jasandy túsik jasatqan. Jasóspirimderdiń 16%-ynda júktilik ózdiginen túsik tastaýmen aıaqtalǵan.