Aqtóbede oqýshy anasyn óltirip, ájesin pyshaqtady

AQTÓBE. KAZINFORM — Qazir qylmystyq is qozǵalyp, tergeý júrip jatyr. Oqýshy óz kinásin moıyndady. 

Aqtóbe oblystyq PD baspasóz qyzmetiniń habarlaýynsha, kúdikti birden ustalǵan. Oqıǵa Aqtóbe qalasynyń ózinde boldy.

— Aqtóbe qalalyq polıtsııasynyń kezekshi bólimine páterlerdiń birinde asa aýyr qylmys jasalǵany týraly habar tústi. Oqıǵa ornyna jetken qyzmetkerler páterden zorlyq belgileri bar áıeldiń máıitin anyqtady. Sonymen qatar osy páterden pyshaq jaraqattary bar qart áıel medıtsınalyq mekemege jetkizildi. Kúdikti óz kinásin moıyndap otyr. Tergeý jalǵasady, — dep habarlady Aqtóbe oblystyq PD baspasóz qyzmeti.

Qazirgi kezde jaralanǵan áıel aýrýhanada em alyp jatyr. Oblystyq densaýlyq saqtaý basqarmasy baspasóz qyzmetiniń habarlaýynsha, 71 jastaǵy qarııa № 1 Aqtóbe qalalyq aýrýhanasynyń travmatologııa bólimine jatqyzylǵan. Esin biledi, sóıleı alady jáne jaǵdaıy turaqty.

Aqtóbe oblystyq balalardyń quqyn qorǵaý basqarmasynyń basshysy Latyp Álibı de oqıǵany rastady. Qaza bolǵan áıel kúdikti oqýshynyń anasy, al aýrýhanaǵa túsken qarııa ájesi.

— Balanyń jasy 16-da. Tolyq otbasynan jáne áleýmettik jaǵdaıy jaqsy. Oqý úlgerimi de jaqsy. Minezi tuıyq. Qazirgi tańda tergeý amaldarynyń júrgizilýine baılanysty basqa aqparattardy jarııalaı almaımyz. Al bilim berý uıymdarynda balalar qaýipsizdigin qamtamasyz etý maqsatynda tıisti sharalar kúsheıtildi. Osyǵan baılanysty ata-analardan profılaktıkalyq is-sharalarǵa túsinistikpen qaraýyn, sondaı-aq, balalarynyń tártibinde, minez-qulqynda qandaı da bir ózgeris bolǵan jaǵdaıda beı-jaı qaramaı, baqylaýda ustaýlaryn suraımyz, — dedi ol.

Eske salsaq, Oralda kolledjdiń eki stýdenti tóbelesip, aýrýhanaǵa tústi.