Aqtóbede oqý-jattyǵý jıyny kezinde kóz jumǵan jas balýannyń anasy kinálilerdiń jazalanýyn surady
AQTÓBE. KAZINFORM – Qylmystyq kodekstiń «Qaýipsizdik talaptaryna saı kelmeıtin taýarlardy shyǵarý ne satý, jumystardy oryndaý ne qyzmetter kórsetý» baby boıynsha qozǵalǵan is toqtatyldy. Al jas balýan Rahymjan Elepbergenovtiń ata-anasy jattyqtyrýshyny jumystan shyǵaryp, tergeýdi qaıta júrgizýdi surap otyr.
Oqıǵa bıyl 4-aqpan kúni boldy. Aqtóbe oblysy Mártók aýdany Rodnıkovka aýylyndaǵy mektepte oqyp, qazaq kúresinen úıirmege qatysqan Rahymjan Elepbergenov Aqtóbe qalasyndaǵy oqý-jattyǵý jıynyna keledi. Sol kezde qarsylasy jambasqa laqtyrady. Sol sátte jas balýan basyn ustap, buryshta jatyp qalady.
- Sol jerde Rahymjan 6 mınýt boıy jatyp qalady. Turǵysy keledi, tura almaıdy. Otyrady, tizerleıdi, jatady. Biz kezde bir bala kelip, jattyqtyrýshyny shaqyrady. Jattyqtyrýshy kelip, balamdy kúshtep turǵyzady. Sol sátte Rahymjan qulap, esinen tandy. Jan-jaǵyndaǵylar ony sol jerde sheshindirip, tórt jigit súırep, dalaǵa alyp shyǵady. Bul qysta, aqpanda boldy. Al jattyqtyrýshy bizge «kúresti, otyrdy, sý iship keldi, sodan keıin aýzynan kóbik aǵyp, qulaı bastap edi tirep qalyp, jedel járdem shaqyryp, jiberdim» dedi. Bárine osylaı aıtty. Jaraqat alǵanyn bilgennen keıin ákesi túnde vıdeony qarady. Sodan dárigerlerden balamyzdy menıngıtten emes, jaraqattan emdeýdi suradyq. Balany qalalyq balalar aýrýhanasynan oblystyq aýrýhanaǵa aýystyryp, basyna qan quıylǵanyn bildi.
Al qalalyq balalar aýrýhanasynda neırohırýrgııa bólimi joq. Arada 28 saǵat ótkennen keıin ota jasaýǵa kiristi.
Qolymyzda saraptama qorytyndysy bar. Onda doǵal zatpen urylǵan dep tur, - dedi Gúlderaı Gadılshına.
Marqum Rahymjan Elepbergenovtiń ata-anasy polıtsııa taratqan aqparatty jaqynda ǵana kórdi. Onda istiń toqtatylǵany týraly jazylǵan.
- Qylmystyq kodekstiń «Qaýipsizdik talaptaryna saı kelmeıtin taýarlardy shyǵarý ne satý, jumystardy oryndaý ne qyzmetter kórsetý» baby boıynsha is qozǵaldy. Barlyq qajetti tergeý áreketteri júrgizildi, sonyń ishinde beınebaqylaý kameralarynyń jazbalary qaralyp, kýágerler men oqıǵaǵa qatysýshylardan jaýap alyndy. Qylmystyq quqyq buzýshylyq quramynyń bolmaýyna baılanysty is qadaǵalaýshy organnyń kelisimimen toqtatyldy,- dedi Aqtóbe oblystyq PD baspasóz qyzmeti.
Biraq ata-anasy munymen kelispeı, isti qaıta tergeýdi surap otyr. Zańgerlerden de kómek kútedi.
- Ol kúni oqý-jattyǵý jıynynda medıtsına qyzmetkeri bolmaǵan. Densaýlyǵyna baılanysty demalysqa ketip qalǵan. Bir qıyny jattyqtyrýshysy keshirim suramady. Aýrýhanada jatqan balam arada 42 kún degende esin jıdy. Sóıleı almady, qımyldamady. Bas súıeginiń jartysy bolmady. Tanymaıdy, bilmeıdi. Arada 61 kún ótkende kózi móltildep jatyp, ketti. Eki aı aýrýhananyń aldynda júrdik shyryldap. Ony Astanaǵa tasymaldaýǵa múmkindik bolmady. Es jıǵannan keıin 5 kún ǵana palatada jatty, keıin qaıta esinen aıyryldy,- dedi anasy Gúlderaı Gadılshına.
Alǵashynda anasy balasyn oqý-jattyǵý jıynyna jibergisi kelmedi, tipti jibermedi. Biraq oqý-jattyǵý bastalyp ketkennen keıin apasymen erip, qalaǵa jolǵa shyqty. Onda da jattyqtyrýshynyń kerek-jaraǵyn aparýdy syltaýratypty.
- Bizge 1 teńge de kerek emes. Biz sport salasynda mundaı adamdar jumys istemeýi kerek dep aıtyp otyrmyz. Ereımentaýda jas balýan kóz jumdy. Oqıǵa qaıtalanyp tur. Dál sol jattyqtyrýshylar Rahymjannyń bapkerleri edi. Eshteńeniń ózgermegenin, eshkim jazalanbaǵanyn kórip otyrmyz. Oblystyq dene shynyqtyrý jáne sport basqarmasyna da, oblystyq bilim basqarmasyna da bardyq. Jaýaptylar jazasyn tartsyn, zańgerler kómektesem dese qabyl alamyz,- dedi anasy.
Aqtóbe oblystyq dene shynyqtyrý jáne sport basqarmasynyń basshysy Meırambek Mahambetovtiń aıtýynsha, Rodnıkovka aýylynda qazaq kúresinen úıirme ashyp, balalardy jattyqtyrǵan bapker jumystan shyǵaryldy.
Al onyń mektepten jumystan shyǵarylýyn oblystyq bilim basqarmasy ǵana sheshedi. Sonymen birge qazaq kúresinen aǵa jattyqtyrýshy da jumystan bosatylady.
- Qazaq kúresi erejesine sáıkes laqtyrý ádisi bolǵan. Bapkerlerge myna isiń durys, mynaý burys deıtin kiná bolmaı tur. Bapkerlerdiń ózderi jumysty qoıamyz dep tur. Al sheshindirip, dalaǵa shyǵarǵan degendi estimedim, isten kórmedim. Jedel járdem shaqyryp, alyp ketken. Otbasynan keshirim suraýǵa bardy. Alǵashynda sóılesýge múmkindik bolmady. Aýrýhanaǵa da bardy,- dedi Meırambek Mahambetov.
Aqtóbe oblystyq densaýlyq saqtaý basqarmasy bolsa jas balýannyń bıyl 5 aqpan kúni oblystyq kópsalaly balalar aýrýhanasyna túskenin, oǵan jabyq bas-mı jaraqaty dıagnozy qoıylǵanyn habarlady.
Sonymen birge basyna qan quıylǵan, es-tússiz bolǵan. Birneshe ret ota jasalǵanymen Rahymjan Elepbergenov 5 sáýir kúni kóz jumdy. Tek oblystyq densaýlyq saqtaý basqarmasy alǵashqy sátte balanyń qalalyq balalar aýrýhanasynda em alǵanyn aıtpady.
Eske salsaq, 7 qyrkúıekte Aqmola oblysy Ereımentaý aýdanynda ótken 2010–2011 jyly týǵan jasóspirimder arasyndaǵy H dástúrli halyqaralyq týrnıri boldy. Aqtóbelik balýan kúres ádisin oryndaý kezinde moıyn omyrtqasynan aýyr jaraqat alyp, esinen tanyp qalǵan.
Keıin dárigerler 2010 jylǵy jasóspirim sanıtarlyq avıatsııamen shuǵyl Astana qalasyndaǵy № 2 kópsalaly qalalyq balalar aýrýhanasyna jetkizilgenin habarlady.
Arada birneshe kún ótkende jas balýan Bahtııar Ahaı kóz jumyp, búgin jerleý rásimi ótti.