Aqtóbede oqý saýattylyǵy kórsetkishi tómen - Oqý-aǵartý birinshi vıtse-mınıstri
AQTÓBE. KAZINFORM – Aqtóbede oblystyq tamyz keńesi ótti. Jıynǵa qatysqan Oqý-aǵartý birinshi vıtse-mınıstri Maıra Meldebekova oqý saýattylyǵy men jaratylystaný baǵytyndaǵy kórsetkishti joǵarylatýdy tapsyrdy.
Aqtóbede 2025-2026 oqý jylyna 441 mektep, 639 mektepke deıingi uıym, 40 kolledj jumys isteıdi. Qazirgi kezde mektepterdegi bilim sapasy 65% qurap otyr. Bul ishki baqylaýdyń kórsetkishi.
- Oblysta jaratylystaný baǵytyndaǵy pánderdiń kórsetkishi tómen bolyp otyr. Ásirese hımııa, fızıka pánderi boıynsha. Oqýshylardyń fýnktsıonaldyq saýattylyǵynyń jetkiliksizdigi, sapaly basqarý, josparlaý, nátıjege qol jetkizýdegi kemshilikter jáne oqý jetistikterin baǵalaý monıtorıngin júrgizýdegi júıeliliktiń jetispeýi keri áser etti. Osy olqylyqty joıý maqsatynda mektepterge Bilim-ınnovatsııasy lıtseıiniń tájirıbesi engiziledi. Pedagogterdiń biliktiligin arttyrady, oqý ádisi engiziledi. Memorandým aıasynda 40 mektep qamtylady,- dedi Aqtóbe oblystyq bilim basqarmasynyń basshysy Bulbul Kúzembaeva.
Sóıtip jaratylystaný pánderi boıynsha kórsetkishti 7-10 paıyzǵa arttyrý josparlanǵan.
- Buǵan deıin Aqtóbede shaǵyn jınaqtalǵan mektep kóp bolǵandyqtan aýyl mektepteriniń bilim sapasy másele boldy. Byltyr aýyl mektepterin damytý jobasy qolǵa alynyp, tsıfrlandyrý, sonyń ishinde ınternetpen qamtý iske asty. Jalpy elimizdiń óńirlerine qaraı jospar qurylyp, soǵan baılanys jumys júredi. PISA – bizdiń kontseptýaldyq qujatymyzdyń ındıkatory. Munda kórsetkish alty deńgeımin ólshenedi. Sonyń ishinde Aqtóbede oqý saýattylyǵyna baılanysty kórsetkish tómen bolyp tur. Bilim basqarmasy, bólimderi men mektep dırektorlarymen kezdesip, aıtyldy. Jaratylystaný baǵaty boıynsha da kórsetkishterdi joǵarylatý kerek,- dedi QR Oqý – aǵartý birinshi vıtse-mınıstri Maıra Meldebekova.
Eske salsaq, Aqtóbede 2025-2026 oqý jyldarynda 19 270 bala 1 synypqa qabyldanady.
Sondaı-aq jańa oqý jylynda 6 mektep qoldanysqa beriledi.
«Keleshek mektepteri» jobasy aıasynda 4 mektep ashylyp, 2 jeke mektep qabyldaý júrgizedi.