Aqtóbede oqý aqysyn birden 93% kótergen kolledjdiń stýdentteri men ata-analary qarsylyq bildirdi
AQTÓBE. KAZINFORM — Joǵary kópsalaly «Bolashaq» kolledjinde oqý aqysy birden 200 000 teńgege kóterildi. Buryn 450 000 teńge tólep júrgen stýdentter endi 650 000 teńge tóleýge qarsy. Búgin ata-analar men stýdentter kolledjge jınalyp, shaǵymyn jetkizdi.
Aqtóbedegi joǵary kópsalaly «Bolashaq» kolledjinde 1 500 stýdent bar. Bıylǵy oqý jylynda shamamen 700 stýdent oqýǵa qabyldanǵan. Munda muǵilim de, zańgerler men esepshiler, týrımz, órt qaýipsizdigi salasymen qatar medıtsına qyzmetkerleri daıyndalady.
Talapkerlerden UBT qorytyndysyn talap etpeıtinin de jazǵan. Shaǵyn ǵana oqý ǵımaratyna búgin ata-analar men stýdentter jınalyp, oqý sapasymen qatar oqý aqysyna qarsylyǵyn bildirdi.
— Byltyr oqýǵa túsken kezde oqý aqysy 300 myń teńge boldy. Bıyl 2-kýrsqa aýystyq, oqý aqysy biz oılaǵandaı 400 myń emes, 575 myń teńgege jetti. Demek 93% kóterip tur. Kelisimshartta ınflıatsııaǵa baılanysty kóteredi dep jazǵan. Ulttyq banktiń málimeti boıynsha, ınflıatsııa 9,3% bolyp tur. Bizge eshqandaı qujat bermedi, qosymsha kelisimshart ta joq. Bul kolledjde alyp bara jatqan bilim de joq. Al aqysyna qarasaq ýnıversıtetpen birdeı ǵoı… Ári oqý aqysynyń naqty qansha teńgege kóterilgenin 6 qazan kúni aıtyp otyr, — dedi akýsher isi mamandyǵynyń stýdenti Dınara Qoıshyǵulova.
Farmatsııa mamandyǵyna túsken Farıda Sattyqovanyń aıtýynsha, oqý aqysy týraly málimetti jaz boıy suraǵan. Oqý bólimi aldyn ala aqparat bermegen.
— Sabaq qazan aıynda bastaldy. Sol kezden-aq kún saıyn surap júrdik. Kýrator da, rektor da aıtpady. Toptaǵy stýdentter rektorǵa barǵan kezde 550 000 teńge bolǵanyn jetkizgen. Biz qaı zańǵa, qaı talapqa súıenip ósirgenin suraǵan edik. «Sharýań bolmasyn, ózim bilem» dep aıtqan. Osyndaı qıyndyqqa tap boldyq. Bıyl ǵana emes, kelesi jyly da kóteredi eken. Basqa oqý ornyna aýysý úshin oqý aqysynyń teń jartysyn tóleý kerek, qujatty bermeıdi. Men qarsymyn, eshkim bizdiń sózimizdi tyńdaǵan emes. Negizi kelisim boıynsha keshki oqýǵa túsken edik. Jumys isteımiz, keshke kelip oqımyz, — dedi Farıda Sattyqova.
Al kolledj ákimshiligi bolsa oqý aqysyn naryqqa rettep 50-56% kótergenin ǵana rastady.
— Naryq zamanyna baılanysty oqý aqysynyń kóterilip jatqany ras. Biz jeke kolledj bolǵasyn óz-ózimizdi qamtamasyz etemiz. Ár mamandyqta bólek-bólek 50-56% kóterildi. Oqý ornyna túsken kezde biz kelisimshart beremiz. Kelisimshart eki tilde. Sol kelisimshartta ózgerýi múmkin degen jazylǵan. «Bizge nege jazda aıtpady» deıdi narazylar. Oqý jyly 1-qyrkúıekten bastaldy. Jan-jaqtan málimetterdi qaraımyz. Sóıtip jınalysta osyndaı uıǵarymǵa keldi. Bıyl 600-700-diń ústinde stýdent qabyldandy. Kolledjde 1 500 stýdent bar, — dedi Joǵary kópsalaly «Bolashaq» kolledjiniń tárbıe isi jónindegi orynbasary Gúlnaz Omarova.
Ata-analardyń bir toby prokýratýraǵa shaǵym túsirgenin de málimdedi.
Eske salsaq, byltyr Aqtóbedegi Qazaq-orys halyqaralyq ýnıversıteti lıtsenzııasynan aıyrylyp, jabyldy.
