Aqtóbede ókpesi qabynǵandardy barlyq aýrýhana qabyldap jatyr
AQTÓBE. QazAqparat – Aqtóbede ókpeniń qabynýy dertinen 18 adam kóz jumdy. Qazir 22 adamnyń jaǵdaıy aýyr, dep habarlaıdy QazAqparat tilshisi.
Sońǵy táýlikte óńirde 18 adamnan koronavırýs ınfektsııasy anyqtaldy. Ósim 3 paıyzdy qurap otyr. Kóbi - Aqtóbe qalasynyń turǵyny. Temir aýdanynda da vırýs juqtyrǵandar bar. Oblys boıynsha indetke shaldyqqandardyń sany 628-ge jetti. Onyń teń jartysy emdelip shyqqan.
Sonymen birge ókpeniń qabylýy da dendep barady. Túshkirip, qyzýy kóterilip, jótelse alǵashqy emdi ýchaskelik dáriger aıtýy tıis. Olarmen onlaın baılanysqa da shyǵýǵa bolady. Al jedel járdem shaqyryp, aýrýhanaǵa alyp ketse, onda dárigerler bar kómekti beredi. Qazir oblysta 156 jasandy tynys alý apparaty bar. Jyl basynda 55 qurylǵyǵa tapsyrys berilgen.
«Temirjol aýrýhanasynda 300 oryn daıyndalǵany belgili. Sonymen birge Aqtóbe medıtsına ortalyǵynda jumys kúsheıip, josparly em qabyldap jatqan adamdar úılerine shyǵaryldy. Sóıtip ortalyq aýrýhanada 300 kereýettik provızorlyq statsıonar jasaqtaldy. Qazirgi kezde 478 adam em qabyldap jatyr. Marat Ospanov atyndaǵy AMÝ-niń emdeý ortalyǵy men Qarǵaly aýrýhanasy, jedel járdem aýrýhanasy nasqastardy qabyldap jatyr», - dedi oblystyq densaýlyq saqtaý basqarmasy basshysynyń mindetin atqarýshy Svetlana Esenamanova.
Onyń aıtýynsha, ókpeniń qabynýy dertine barlyǵy 600-den astam shaldyǵyp, alǵashqylary em alyp shyqqan.
Óńirde ókpeniń qabynýy dertinen 18 adam kóz jumdy. Onyń 8-i temirjol aýrýhanasynda tirkelgen. Kóbine egde jastaǵy adamdar dertinen aıyǵa almaǵan.
«Oblysta taǵy 22 adamnyń jaǵdaıy aýyr. Onyń 12-i jasandy tynys alý apparatyna qosylǵan», - deıdi Svetlana Esenamanova.
Aıta keteıik, Aqtóbedegi jedel járdem qyzmetindegi mamandardyń kóbi dert juqtyrǵan. Qazirgi kezde 120-sy densaýlyǵyna baılanysty demalysta júr.
