Aqtóbede ókpe qabynýymen aýrýhanaǵa túskender qatary azaımady – dáriger
AQTÓBE. QazAqparat – Aqtóbe oblysy boıynsha 2 myńnan astam adam pnevmonııadan emdelip jatyr. Bir táýlikte 100-ge jýyq adam emdeý ornyna jetkizilgen, dep habarlaıdy QazAqparat tilshisi.
Aqtóbe oblysy ákiminiń keńesshisi Áset Qalıevtiń aıtýynsha, óńirde pnevmonııaǵa baılanysty jaǵdaı ázirge kúrdeli. Biraq jergilikti atqarýshy organ bárin baqylap otyr.
«Ókpe qabynýy dertine shaldyǵyp, aýrýhanaǵa túskender sany azaımady. Biraq ósim de joq. Bári turaqty. Ótken táýlikte 98 adam jatqyzyldy. Dálirek aıtsaq, Aqtóbe oblysy boıynsha 2 649 naýqas em alyp jatyr, onyń 761-i ambýlatorııada. Aýdandarda 618 naýqas tirkelip tur. Dári-dármek jetkilikti. Aldaǵy aılarǵa josparlanǵan antıbıotıkter jetkizildi», - dedi oblys ákiminiń keńesshisi Áset Qalıev.
Aıta keteıik, óńirde 46 rentgen apparaty bar. Onyń 18-i provızorlyq statsonarda tur.
«Kezek bar, ol máseleni bilip otyrmyz. Jyljymaly keshen jumysyn bastady. Bul suranysty tolyq qamtyp, qyzmet kórsetý sapasyn arttyrady dep oılaımyz», - dedi Áset Qalıev.
