Aqtóbede ókilettiligin asyra paıdalanǵan tergeýshi aıyptalyp jatyr
AQTÓBE. QazAqparat - Aqtóbe oblystyq Іshki ister departamentindegi esirtkimen kúres basqarmasynyń tergeýshisi Sultan Syrlybaıuly ókilettiligin asyra paıdalanǵany úshin sot aldynda jaýap berip jatyr, dep habarlaıdy QazAqparat tilshisi.
Tergeýshi bolyp jumys istegen 30 jastaǵy Sultan Syrlybaıuly Qylmystyq kodekstiń «Bılikti nemese laýazymdyq ókilettikterdi asyra paıdalaný» baby boıynsha aıyptalyp jatyr. Іs materıaldaryna súıensek, ol 2016 jyldyń naýryz-tamyz aılarynda Asqar Sandybaevqa qatysty isti tergeıdi. Qylmysker asa iri kólemde eskirtki saqtaǵany úshin isti boldy. Tergeý júrgizgen Syrlybaıuly tintý kezinde páter ishinen qylmyskerdiń uıaly telefony men sómkesin alyp qoıǵan. Keıin ózi paıdalanǵan. Sol kezde páter ishinde kúdiktiniń áıeline tıesili 323 myń teńge tabylyp, tergeýshi 183 myń teńgeni zańsyz ıemdendi.
«Sol kezderi tergeýshi bolyp jumys istegen Sultan Syrlybaıuly qylmysker Asqar Sandybaevtyń áıeli Almıra Jumaǵazınany «sybaılas retinde qylmystyq jaýapqa tartamyn» dep qorqytqan. Sóıtip, Jumaǵazınaǵa barlyq aqshany aldy degen qolhat jazdyryp alǵan. S.Sandybaıuly munymen shektelmeı, Ózbekstan azamaty A.Ismaılovty aqysyz qurylys jumystaryna tartty. Ol Sandybaevtyń isi boıynsha kýáger retinde qatysqan bolatyn», - dep jazylǵan aıyptaý qorytyndysynda.
Sot otyrysy ashyq ótip jatyr. Sot otyrysy kezinde jábirlenýshi Almıra Jumaǵazına aıyptalýshy S.Sandybaıuly ózin qorqytqanyn, turaqty jumysy joq bolǵan soń massaj jasap, aqsha taýyp júrgenin bilgen kezde qyzmetin oǵan da kórsetkenin aıtyp berdi.
Aıta keteıik, iri kólemde esirtki tasymaldaǵan Asqar Sandybaev 7 jylǵa bas bostandyǵynan aıyryldy. Ol elimizdiń shyǵysyndaǵy abaqtynyń birinde jazasyn ótep jatyr.
