Aqtóbede oq tıgen bes adam aýrýhanaǵa jetkizildi
AQTÓBE. QazAqparat - Hromtaý aýdandyq aýrýhanasyna jetkizilgen bes adamnyń bárine oq tıgen, dep habarlaıdy QazAqparat tilshisi.
20 aqpan kúni saǵat 22:10-da Hromtaý aýdandyq aýrýhanasyna oq jaraqatyn alǵan 5 adam jetkizilgen.
«Jedel tergeý toby qurylyp, úsh kúdikti ustaldy. Olar bar kinány moıyndady. Kúdiktiler adamdardy atqan soń 16 kalıbrli eki ańshy myltyǵyn Bógetsaı aýyly mańyndaǵy Or ózeniniń kópir astyna jasyryp qoıǵan. Vaz-2114 markaly reseılik nómirli kólik pen eki qarý tárkilendi», - dep habarlady oblystyq PD baspasóz qyzmetiniń jetekshisi Erbolat Sarqulov.
Aıta keteıik, Qylmystyq kodekstiń «Adam óltirýge oqtalý» babymen is qozǵaldy. Tergeý júrip jatyr. Birneshe saraptama taǵaıyndaldy. Oqıǵanyń sebebi anyqtalýda. Kúdiktiler ýaqytsha tergeý ızolıatoryna qamaldy.
