Aqtóbede «oq ótpeıtin» áınegi bar aıaldama ornatý jumysy aıaqtalmaı jatyr
AQTÓBE. QazAqparat - Aqtóbe qalasyndaǵy aıaldamalarǵa brondalǵan áınekter salynyp jatyr. Qala ákimi Іlııas Ispanov bul arnaıy tapsyryspen jasalǵan aıaldama ekenin aıtty, dep habarlaıdy QazAqparat tilshisi.
Aqtóbe qalasynda 500-ge jýyq aıaldama bar. Onyń teń jartysyna aıaldama pavılony qoıylǵan, ózgesinde adamdar jol jıeginde turady. Qazirgi kezde Aqtóbe qalasynyń basty dańǵyldarynda aıaldama salý jumysy júrip jatyr. Ol úshin aıaldama pavılonynyń bir buryshyn saýda ornyna aınaldyrǵandardy joıyp, jańasyn qondyrý qarastyrylǵan. Ótken jyly 34 aıaldama salynyp, onyń 12-i bıýdjet qarjysyna turǵyzyldy. Al ózgesi bıznestiń áleýmettik jaýapkershiligi aıasynda salynýda. Kásipkerler aıaldama pavılonyn qondyrý týraly usynysty ózderi aıtady.
«Qazirgi aıaldama jelden, kúnnen, jańbyrdan saqtamaıdy dep aıtady. Bul syn durys. Biraq aıaldamada adamdar uzaq turmaıdy. Sol baǵytta jumys istep, qoǵamdyq kólikterdiń ara qashyqtyǵyn qalpyna keltirip jatyrmyz. Mundaı aıaldamalar Astana qalasynda bar. Astananyń aýa raıy bizden salqyn. Bul aıaldama qalanyń bir atrıbýty, dızaınǵa saı keledi. Qalalyq keńeste qaraldy, maquldandy. Jyl basynda memlekettik satyp alý júrgizildi. Jeńimpaz kompanııa qyrkúıek aıyna deıin óz mindetterin oryndamaǵan soń sotqa shaǵymdandyq», - dedi Aqtóbe qalasynyń ákimi Іlııas Ispanov.
Aıta keteıik, endi «Tabys Aqtóbe» JShS arqyly 19 aıaldama satyp alynady. Onyń úsheýi úlken. Bul aıaldama pavılondary adamdar kóp shoǵyrlanatyn oryndarǵa qoıylady.
«Dóner, samsa satqan aıaldama pavılondary joıylady. Bári jol-kólik erejesine saıy bolýy kerek. Memlekettik satyp alýdy utyp alǵan kásipker úsh ret biz qoıǵan talapqa saı kelmeıtin aıaldama pavılonyn ákeldi. Talap boıynsha brondalǵan áınek qondyrylǵan. Qoǵamdyq oryndaǵy áınek synǵan kezde adamdardy zaqymdamaıdy. Aıaldama jaryqtandyrylady, shamy túnde janyp turady. Biz ár aıaldamany salýǵa 1,5 mıllıon teńge bekitken bolatynbyz. Olar 1,1 mıllıon teńge usyndy. Qoıǵan talapqa saı kelmeı jaz boıy aıaldamalar salynbady»,- dedi Іlııas Ispanov.
Eske salsaq, buǵan deıin jergilikti ákimdik USB porty bar aıaldamanyń árqaısysyn 1,6 mıllıon teńgege satyp alǵan bolatyn. Bul aıaldamalar qazir isten shyǵyp, basqa aýdandarǵa kóshirilip jatyr. Jalpy Aqtóbeniń Ábilqaıyr han men Álııa Moldaǵulova dańǵylyna qalalyq keńeste bekitilgen 54 aıaldama ornatylady.
