Aqtóbede ógeı áke-shesheniń qolynda tárbıelenip jatqan 2 myń bala baqylaýǵa alyndy
Taıaýda Bas prokýratýra «E-preventsııa» jobasyn tanystyrdy.
Kámelet jasqa tolmaǵan balalardy qorǵaýǵa baǵyttalǵan jańa joba aldymen Astana qalasy men Aqtóbe oblysynda iske asady.
Maqsat – balalardy qorǵaý. Qazirgi kezde Aqtóbe oblysynda 2500-den astam kámeletke tolmaǵan bala ógeı áke nemese shesheniń qolynda tárbıelenip jatyr.
Sonymen birge 67 kámeletke tolmaǵan bala patronat otbasynda erjetip jatyr.
«Bul sanattaǵy balalardyń quqyǵyn qorǵaý maqsatynda bilim baqarmasynyń mamandarymen birge tekserý júredi. Olarǵa jandynama taratylady. Seksýaldyq qatynas, sýıtsıdtiń aldyn alý týraly aıtylady. Biz pedagogtarmen qatar psıhologtardy janymyzǵa ertip júremiz. Árıne, muǵalim sabaqtan soń túnde bizben jıi erip júre almaıdy. Al kúndiz ata-analar jumysta. Sondyqtan barlyq tarapqa yńǵaıly ýaqyt kelisip tańdalady. Kóbine keshkilik shyǵamyz»,- dedi Aqtóbe oblystyq polıtsııa departamenti jergilikti polıtsııa qyzmeti basqarmasy ıývenaldy polıtsııa tobynyń erekshe tapsyrmalar boıynsha aǵa ınspektory Nurjan Mýkýmov.
Aıta keteıik, oblysta «Otbasy», «Qolaısyz tereze», «Túngi qaladaǵy balalar», «Jasóspirim», «Kanıkýl» atty aldyn alý is-sharalary ótti.
Jyl basynan beri 4300-den astam kámeletke tolmaǵan polıtsııa bólimine jetkizildi.
Balasy túngi ýaqytta qaraýsyz júrgeni úshin 3700-den asa ata-ana jaýapqa tartyldy.
«125 bala túngi ýaqytta oıyn-saýyq mekemelerinde ata-anasyz júrgen. Sol sebepti ata-analary jaýapqa tartyldy. Olardy kirgizgen 80 oıyn-saýyq mekemesi, ıaǵnı, jeke kásipker ákimshilik jaýapqa tartyldy. Arasynda oıyn klýbtary, kompıýter klýbtary, meıramhana, dámhana da bar. Keıbirinde balalar zańsyz jumys istegen. Kámeletke tolmaǵandar arasynda urlyq, usaq buzaqylyq jıi kezdesedi. Keıde óz qurbylarynan urlaıdy. Usaq urlyq týraly aıtar bolsam, sýpermarketten taǵam urlaý deregi kezdesedi. Shokolad, sýsyn alady. Balalar bir-birimen tóbelesip qalyp jatady. Bıyl mektep, kolledj oqýshylary men JOO-da oqıtyn kámeletke tolmaǵandar arasynda 78 qylmys tirkeldi. Bıyl 485 kámeletke tolmaǵan bala, bala tárbıesimen aınalyspaǵany úshin 365 qolaısyz otbasy esepke alyndy»,- dedi Nurjan Mýkýmov.
Kámeletke tolmaǵandar isi jónindegi komıssııa 522 materıaldy qarady. Bıyl oblysta 16 adam ata-ana quqyǵynan aıyryldy.
Kámelet jasqa tolmaǵan úsh bala sot sheshimimen arnaıy mektepke jiberildi.
«Aqtóbe oblysynda 2561 bala ógeı áke-shesheniń qolynda tárbıelenip jatyr. Meniń oıymsha bul kóp. Ógeı ákeniń bárin qanisher, zorlyq-zombylyqqa beıim dep aıta almaımyz. Onyń ishinde durys otbasylar da bar, qolaısyz otbasylar da bar. Qolaısyz otbasyn esepke alǵan kúnnen bastap qadaǵalaımyz. Adamdar da jasyrmaı ekinshi otbasy týraly aıtady»,- dedi Aqtóbe oblystyq polıtsııa departamenti jergilikti polıtsııa qyzmeti basqarmasy ıývenaldy polıtsııa tobynyń erekshe tapsyrmalar boıynsha aǵa ınspektory Nurjan Mýkýmov.
