Aqtóbede offlaın oqýǵa ruqsat: Ata-analar mektepke balalaryn jibermeýde
Aqtóbede keıbir oqýshylar bir jyl boıy onlaın dáris alyp, búgin alǵash ret partaǵa qaıta otyrdy. Jalpy oblys boıynsha oqýshy sany 300-den aspaıtyn 244 mektepte oqý dátúrli túrde bastaldy. Taǵy 161 mektepte oqý aralas formatta júredi. Al Aqtóbe qalasyndaǵy úsh aýysymdy 7 mektepte oqý onlaın júrgiziledi. Munda 9 jáne 11, 1-5 synyp oqýshylary mektepke baryp júr.
«Búgin birinshi aýysymda bilim alatyn oqýshylardyń 90 paıyzdan astamy mektepke keldi. Degenmen balasy úshin alańdap, mektepke jibergisi kelmeıtin ata-analar da bar. Oblystyń bas sanıtarlyq dárigeriniń qaýlysy negizinde kezdesken máselege toqtalǵym keledi. Synypty ekige bólip, onlaın nemese offlaın ótkizý qarastyrylmaǵan. Oǵan múmkindik joq. Eger ata-analar ózara kelisip, bir oqý úlgisin tańdasa, biz ruqsat etemiz. Máselen, 25 oqýshy qashyqtan oqýdy jón kórse, kelisemiz. Bilim basqarmasy balalardyń mektepke kelýin quptaıdy. Sanıtarııalyq norma túgel saqtalady. Balalar qosymsha bilim alyp, 11 mamyr men 19 maýsym aralyǵynda ótken taqyryptar qaıta pysyqtalady», - dedi oblystyq Bilim basqarmasynyń basshysy Joldas Batyrhan.
Aıta keteıik, qyrkúıek aıynan beri oblysta 509 oqýshy, 147 muǵalim koronavırýs ınfektsııasyn juqtyrǵan. Qazir barlyǵy 70 bala dárigerler baqylaýynda. Al 7 bala statsıonarlyq em qabyldap jatyr. Olardyń jaǵdaıy jeńil jáne ortasha aýyr.
