Aqtóbede obyr derti asqynyp tur
AQTÓBE. QazAqparat-Aqtóbede obyr derti asqynyp tur, dep habarlaıdy «QazAqparat» tilshisi. Naýqastardyń 60 paıyzdan astamy 1, 2 satysynda dárigerge qaralyp, em qabyldaıdy. Bul respýblıkalyq kórsetkishten joǵary.
«Ótken jyly 1448 adamnan qaterli isik anyqtaldy. Kóbi alǵashqy satysynda em qabyldady. Derttiń anyqtalýyna skrınıngtik tekserýler áser etip jatyr. Óńir boıynsha birinshi orynǵa asqazan obyry shyqty. Ótken jyly 167 adamnan, ıaǵnı, naýqastardyń 20 paıyzynan asqazan obyry anyqtaldy. Sodan keıin ókpe, sút bezi, teri men óńesh obyry tur. Qaterli isik boıynsha Mártók, Yrǵyz aýdandary men Aqtóbe qalasynda ólim jıi tirkelgen»,- deıdi oblystyq densaýlyq saqtaý basqarmasynyń basshysy Áset Qalıev. Kóbi ókpedegi qaterli isikten kóz jumǵan.
Oblystyń bas onkologi Árip Qoıshybaevtyń aıtýynsha, ótken jyly 100 myń turǵynǵa shaqqanda 71 adam túrli obyr dertinen qaıtys bolǵan.
Aıta keteıik, Aqtóbe oblysy medıtsınalyq klasterdi damytý maqsatynda keler jyly pozıtrondy-emıssıondyq tomografııa satyp alýdy josparlap otyr. Bul apparat obyr dertine shaldyqqandardy otadan keıin qaıta tekserip, isik qaıtalansa, ony erte anyqtaýǵa múmkindik beredi.
