Aqtóbede oblystyq ólketanýshylar odaǵy qurylady
Aqtóbe ólketanýshylary jazǵan maqalasyn jınaqqa engize alady. Búgin oblystyq mýzeıdiń dırektory Meıram Dúısenov tarıhı oryndardy aralap, kıeli jerlerdiń tizimin jasap, tarıhı derekter jınaqtap júrgen aqtóbelik ólketanýshylarǵa eki usynysyn jetkizdi.
«Aqtóbe oblystyq ólketanýshylar odaǵyn qurý jospary bar. Oblystyq mýzeı qurylysy aıaqtalǵan soń jańa ǵımaratta bas qosyp, jumys barysyn josparlaýǵa múmkindik týyp otyr. Sonymen qatar, jyl saıyn maqalalar jınaǵyn shyǵaramyz. Bul zertteý jumystaryn keńeıtýge, tyń derekterdi saqtaýǵa septigin tıgizedi. Osy jumysty jergilikti ólketanýshylar qoldasa, úlken isti bastaımyz», - dedi oblystyq tarıhı-ólketaný mýzeıiniń dırektory Meıram Dúısenov.
Sonymen qatar, búgin S.Báıishev atyndaǵy Aqtóbe oblystyq ámbebap-ǵylymı kitaphanasynda «Qazaqstannyń óńirlik qasıetti nysandary», «Qazaqstannyń jalpyulttyq qasıetti nysandary» kitaptarynyń tusaýkeri ótkizildi. «Qasıetti Qazaqstan» zertteý ortalyǵynyń bólim meńgerýshisi Aıgúl Ekimbaevanyń aıtýynsha, qazirgi kezde aqtóbelik arheologtar men ınspektorlar tarıhı oryndardy qorǵaý, saqtap qalý jumysy boıynsha elimizde alda kele jatqanyn jetkizdi.
«Arheologtar zertteý júrgizip, qazba jumystaryn jasaıdy. Keıde olarǵa qolda bar qundy jádiger týraly jazyp shyǵý qıyn. Al ólketanýshylar ańyz áńgimeler men tarıhı derekterge júginip jumys isteı alady. Sondyqtan tarıhshylar, arheologtar, ólketanýshylar men kitaphanashylar birge jumys isteý kerek. Sonda jumys nátıjeli bolady. Ári kıeli oryndardy nasıhattaý jumysyn jandandyra túsý kerek»,- dedi Aıgúl Ekimbaeva.