Aqtóbede oblystyq mańyzy bar joldarǵa avtomattandyrylǵan ólsheý stansasy qondyrylady
AQTÓBE. KAZINFORM – Aqtóbeniń munaıly aýdanyndaǵy oı-shuńǵyry kóp jol kóptiń ashýyn týdyrdy. Ákimdik joldy tegisteıtinin, keıin oblys boıynsha avtomattandyrylǵan 5 ólsheý stansasy qondyrylatynyn habarlady.
Aqtóbedegi Pokrovka-Temir-Keńqııaq-Embi oblystyq mańyzy bar jol kezeń-kezeńimen jóndelip jatyr. Alaıda jol lezde buzylyp, turǵyndardyń qatynasy qıyndady. Aýyr júk kólikteri júrip ótken soń joldyń keıbir bóligi aıýdyń apanyndaı shuńqyrǵa aınaldy. Turǵyndar ony áleýmettik jelige jarııalap, ákimdikten jolda júrýdiń amalyn surady.
– Bul Pokrovka-Temir-Keńqııaq-Embi oblystyq mańyzy bar jol. Jol munaaıly ólkede ornalasqan. Tórtinshi sanattaǵy jol. Aýyr júk kólikteri júrip, aqaý keltirdi. Qazirgi tańda kútip ustaýǵa jaýapty mekeme tegisteý jumysyn júrgizip jatyr. Tegisteý jumysy júrgizilgen soń shuńqyrlar jóndeledi. Sonymen birge kólik ınspektsııasymen birge reıd uıymdastyramyz. Sonymen birge oblystyq mańyzy bar 5 jolda avtomattandyrylǵan ólsheý stansasyn qondyrý josparlanyp otyr. Jumysty bastaýǵa qarjy bólindi. Aýyr júk kóligi ótkende salmaǵy ólshenedi. Shekti salmaqtan asyp ketse, avtomatty túrde aıyppul salynady, - dedi oblystyq jolaýshylar kóligi jáne avtomobıl joldary basqarmasy basshysynyń orynbasary Eset Amanbaev.
Aıta keteıik, bıyl oblysta aýdandyq, oblystyq mańyzy bar joldarǵa 50 mlrd teńgeden astam qarjy bólindi. Bul qarjyǵa 400 shaqyrym jol jóndelip, salynyp jatyr.
Buǵan deıin habarlaǵanymyzdaı, Aqtóbede nebári 500 metr bolatyn jol bar. Merdiger byltyr bastaǵan jumysyn bıyl aıaqtaýy tıis.